काठमाडौं- नेपाल राष्ट्र बैंकले मोबाइल बैंकिङ, इन्टरनेट बैंकिङ, इलोक्ट्रोनिक कार्ड र डिजिटल वालेटहरुमार्फत् रेमिट्यान्स पठाउन मिल्ने व्यवस्था गरेको हो।
अहिलेसम्म रेमिट्यान्स पठाउनको लागि कम्पनी वा बैंक खाता मात्र प्रयोग गर्नुपर्ने हुन्थ्यो।
राष्ट्र बैंक विदेशी विनिमय व्यवस्थापन विभागले सोमबार एक परिपत्र जारी गर्दै विदेशमा रहेका नेपालीहरुले डिजिटल माध्यमबाटै नेपालमा पैसा पठाउन पाउने व्यवस्था गरेको छ।
जसका लागि नेपालका बैंक तथा वित्तीय संस्था एवम् विप्रेषण सेवा प्रदायक कम्पनीहरुले विदेशमा काम गरिरहेका नेपालीहरु कार्यरत रहेका देशमा सञ्चालनमा रहेका डिजिटल पेमेन्ट गर्ने संस्थासँग आबद्ध हुनु पर्नेछ।
राष्ट्र बैंकले डिजिटल प्रविधिलाई विकास, विस्तार र प्रोत्साहन गर्दै मोबाइल वालेट रेमिट्यान्सको व्यवस्या गरेको र यसले रेमिट्यान्स आप्रवाहमा सहयोग गर्नेछ।
नेपालका बैंक तथा वित्तीय संस्थाद्वारा सञ्चालित मोबाइल बैंकिङ, इन्टरनेट बैंकिङ, इलोक्ट्रोनिक कार्ड र इ सेवा, आइएमई पे, फोन पे जस्ता मोबाइल वालेटहरुमार्फत् पनि घरैमा बसीबसी रेमिट्यान्स पाउन सकिने छ।
यससँगै विप्रेषण सम्बन्धी कारोबार गर्ने बैंक तथा वित्तीय संस्थासँग आबद्ध भई विदेशमा रहेका नेपालीले विद्युतीय भुक्तानीका उपकरणहरु मोबाइल बैंकिङ, इन्टरनेट बैंकिङ, इलोक्ट्रोनिक कार्ड र डिजिटल वालेटहरु मार्फत् नेपालमा रहेका आफन्तहरुको खातामा पैसा पठाउन पाउने सक्नेछन्।
