टोकियो ओलम्पिकबारे निर्णय गर्न आईओसीले लियो चार साताको समय

टोकियो – अन्तर्राष्ट्रिय ओलम्पिक कमिटी (आइओसी) ले टोकियो ओलम्पिक २०२० स्थगित गर्ने वा तोकिएको मितिमा आयोजना गर्ने विषयमा चार सातापछि निर्णय हुने भएको छ ।

आइओएसीको कार्यकारी समितिको आइतबार बसेको बैठकपछि यस्तो निर्णय गरिएको हो । संसारभर फैलिरहेको कोरोनाभाइरसको संक्रमणको कारण ओलम्पिक छनोटमा असर गरेपछि संसारभरबाट ओलम्पिक स्थगित गर्ने दबाब बढिरहेको छ ।  आगामी २५ जुलाईदेखि जापानको टोकियोमा ओलम्पिक हुने तय छ ।

ओलम्पिक आउन चार महिना बाँकी रहे पनि ओलम्पिक छनोटका अधिकांसका प्रतिस्पर्धा प्रभावित भएका छन् । संसारका २ सय भन्दा बढी देशका ११ हजार भन्दा बढी खेलाडीले सहभागिता जनाउने ‌ओलम्पिकलाई कोरोनाभाइरसले असर पर्ने देखिएपछि आयोजक जापानले एक महिना सार्न सकिने संकेत दिएको छ ।