काठमाडौं – काठमाडौं म्याराथनको उपाधि कान्छीमाया कोजुले जितेकी छिन् । नेपाल एपीएफ क्लबकी कान्छीमाया कोजुले काठमाडौं म्याराथनमा ह्याट्रिक उपाधि जितेकी हुन् ।
शनिबार बिहान भएको १३औं संस्करणको म्याराथनमा कान्छीले निर्धारित दूरी २ घन्टा ५७ मिनेट २७ सेकेन्डमा पूरा गर्दै ह्याट्रिक उपाधि जितेकी हुन् । प्रतियोगितामा सरिता बासी ३ घण्टा १९ मिनेट ७ सेकेण्डमा निर्धारित दूरी पार गर्दै दोस्रो भइन् । त्यस्तै निर्धारित दूरी ३ घण्टा ४७ मिनेट ४५ सेकेण्डमा पार गर्दै निर्जला ताम्राकार तेस्रो भइन् ।
पुरुषतर्फ विभागीय त्रिभुवन आर्मी क्लबले वर्चस्व जमाएको छ । नरेन्द्र सिंह रावल च्याम्पियन बनेका छन् । दोस्रो र तेस्रो स्थान पनि आर्मीकै खेलाडीले जितेका छन् । नरेन्द्रले निर्धारित दूरी २ घन्टा ३३ मिनेट १० सेकेन्डमा पूरा गर्दै च्याम्पियन बने ।
आर्मीकै वेदबहादुर सुनारले निर्धारित दूरी २ घन्टा ३४ मिनेट २० सेकेन्डमा पूरा गर्दै दोस्रो स्थान हासिल गरे । आर्मीकै ज्ञानप्रसाद भट्टराईले २ घन्टा ३४ मिनेट ४५ सेकेन्डमा पूरा गर्दै तेस्रो स्थान हासिल गरे ।
