काठमाडाैं – नेपालकी राष्ट्रिय महिला क्रिकेट टिमकी सदस्य अन्जली चन्दले टी-ट्वान्टी अन्तराष्ट्रिय क्रिकेटमा विश्व कीर्तिमान बनाएकी छिन् ।
पोखरामा जारी १३ औं दक्षिण एसियाली खेलकुद (साग) अन्तर्गत महिला क्रिकेटको पहिलो खेलमा माल्दिभ्सविरुद्ध ६ विकेट लिँदै अन्जलीले कीर्तिमान बनाएकी हुन् । अन्जलीले २ ओभर १ बलमा बिना रन खर्चेर ६ विकेट लिएर कीर्तिमान बनाएकी हुन् ।
सातौं ओभरमा बलिङ गर्न आएकी चन्दले मेडन ओभरमा तीन विकेट लिइन् । यसपछि नवौं ओभरमा दुई विकेट लिइन् । नवौं ओभरमा पनि मेडन नै राखिन् । एघारौं ओभरमा आएकी चन्दले थप एक विकेट लिदैं विश्व कीर्तिमान बनाएकी हुन् । अहिलेसम्म कुनै पनि क्रिकेटरले कुनै रन नदिई ६ विकेट लिएका छैनन् ।
१०.१ ओभरमा १६ रन जोडेको माल्दिभ्सलाई नेपालले बिना विकेटको क्षतिमा ०.५ ओभरमै हराउँदै विजयी शुरुवात गरेको छ । नेपालका लागि करुण श्रेष्ठले १३ रन जोडिन् भने चार रन एक्स्ट्रा मिलेको थियो ।
