१३ औं साग : खोखोमा बांग्लादेशलाई पहिलो पटक नेपालले हरायो

काठमाडाैं – १३ औं दक्षिण एशियाली खेलकूद (साग) अन्तर्गत आइतबार भएको खोखोको पुरुषतर्फको खेलमा नेपालले बांग्लादेशलाई पराजित गरेको छ । कीर्तिपुरमा भएको खेलमा नेपालले बांग्लादेशलाई २१-१९ अंकले पराजित गर्दै प्रतियोगितामा सुखद् शुरुआत गरेको हो ।

जितसँगै नेपालले तीन अंक जोडेको छ । खोखोमा नेपालले पहिलोपटक बांग्लादेशलाई पराजित गरेको हो । पहिलो इनिङको पहिलो टर्नमा चेन्जिङ गरेको नेपालले १२ अंक जोड्दा दोस्रो टर्नमा बांग्लादेशले पनि १२ नै अंक जोड्यो । दोस्रो इनिङको पहिलो टर्नमा नौ अङ्क जोड्दा नेपाल २१-१२ को स्थितिमा पुग्यो ।

तेस्रो टर्नमा बांग्लादेशले सात अंक जोड्दा नेपाल २१-१९ ले विजयी भयो । नेपालको जितमा धनप्रसाद चौधरी, कुशल मेछे र गणेश विश्वकर्माले समान चार/चार अंक जोडे । नेपालले सोमबार दोस्रो खेलमा भारतको सामना गर्नेछ ।