साग उद्घाटनमा नेपालको झन्डा पारसले होइन, कमलले बोक्ने

काठमाडाैं – आइतबार दशरथ रंगशालामा उद्घाटन हुने १३औं दक्षिण एसियाली खेलकुद (साग) मा नेपालको राष्ट्रिय झण्डा भारोत्तोलन खेलाडी कमलबहादुर अधिकारीले बोक्ने भएका छन् ।

नेपाल ओलम्पिक कमिटीले कमलले झण्डा बोक्ने जनाएको हो । नेपाल ओलम्पिक कमिटीले खेल अनुभव, अन्तर्राष्ट्रिय पदक र ओलम्पिक खेलमा समेत सहभागिता जनाइसकेको आधारमा कमललाई झन्डा बोक्न दिने निर्णय गरेको हो ।

यसअघि १३औं सागको प्राविधिक समितिले भने राष्ट्रिय क्रिकेट टिमका पूर्व कप्तान पारस खड्काको नाम सिफारिस गरेको थियो ।  क्रिकेट ‌ओलम्पिक खेल नभएकाले पारसको सट्टामा कमलको नाम पक्का गरिएको हो ।

काठमाडौं, पोखरा र जनकपुरमा मंसिर १५ देखि २४ गतेसम्म हुने उक्त प्रतियोगिताको राष्ट्रपति विद्यादेवी भण्डारीले आगामी आइतबार दशरथ रंगशालामा एक विशेष समारोहबीच उद्घाटन गर्ने कार्यक्रम छ ।