काठमाडौं – साहित्यकार सन्तोष लामिछानेको उपन्यास ‘अल्टिमेट आकाश’ सार्वजनिक भएको छ । म्याडिसन, अमेरिकामा एक समारोहबीच उक्त उपन्यास सार्वजनिक गरिएकाे हाे । अमेरिकामा बसोबास गर्दै आएका लामिछानेको उक्त कृतिमा नेपाली युवाले गर्नु परेको संघर्ष र सफलताको विषय वस्तुलाई समेटिएको छ ।
कृतिमाथि समीक्षा गर्दै लेखक कृष्ण बजगाईंले नेपाली डायास्पोरिक साहित्यमा विषयवस्तु, भाषा र शैलीका हिसाबले रोचक ढंगले उपन्यास आएको धारणा व्यक्त गरे । उपन्यासकारका पिता डा. भरत लामिछानेले उपन्यासका सकारात्मक पक्ष र चुनौतीमाथि चर्चा गरेका थिए । उपन्यासकार लामिछानेले अमेरिकी भूमिमा नेपाली युवाका भोगाइलाई उपन्यासको रूप दिइएको र केही हदसम्म भए पनि यसबाट नेपाली युवालाई फाइदा हुनसक्ने विचार व्यक्त गरे ।
अवैतनिक नेपाली महावाणिज्यदूत प्रेमराजा महतले देशबाट टाढा भए पनि देशकै तर्कनामा रहेर नेपाली भाषा र संस्कृति उकास्न र नयाँ पुस्तालाई सिकाउन लागिपरेको नेपाली समुदाय देखेर आफूलाई खुशी लागेको बताए । साहित्यकार गोवद्र्धन पूजाले सिर्जनात्मक लेखनमा निरन्तर अभ्यासको खाँचो औँल्याए । उपन्यासकार सन्तोष लामिछानेले अमेरिकी भूमिमा नेपाली युवाका भोगाईलाई उपन्यासको रुप दिएको बताउँदै केही हदसम्म भए पनि यसबाट नेपाली युवा लाभान्वित हुन सक्ने बताए ।
उक्त उपन्यासलाई बेलायतस्थित समकालीन साहित्य प्रतिष्ठानले प्रकाशित गरेको हो । महाकवि लक्ष्मीप्रसाद देवकोटाको ११०औंँ जन्मजयन्ती एवं ‘नाफा साहित्यिक साँझ २०७५’ का अवसरमा नेपाली अमेरिकी मैत्री संघ (नाफा)ले आयोजना गरेको कार्यक्रममा उक्त कृति विमोचन गरिएको हो । समकालीन साहित्य प्रतिष्ठान बेलायतबाट प्रकाशित उक्त उपन्यास ‘आमाजोन’ बाट अनलाइनमा बिक्री भइरहेको बताइएको छ ।
