काठमाडाैं – लोकप्रिय लेखक सुविन भट्टराईको पाँचौं कृति ‘प्रिय सुफी’ विमोचन भएको छ । प्रज्ञा प्रतिष्ठानको डबलीमा शनिबार आयोजित कार्यक्रममा अभिनेत्री आँचल शर्मा, लेखक सुविन भट्टराई, गायिकाहरु शीतल मोक्तान र सुवानी मोक्तानले संयुक्त रुपमा पुस्तक विमोचन गर्नुभयो ।
कार्यक्रममा मोटिभेसनल स्पिकर गणेश अगम ढंगानाले आफूले उक्त पुस्तक एकै बसाइमा सकेको प्रतिक्रिया दिनुभयाे । साथै पुस्तकले लभलाई ‘रिडिफाइन’ गरिदिएको समेत दावी गर्नुभयो । पुस्तकले सबैलाई मोटिभेटसमेत गर्ने उहाँको भनाई छ । यसैगरी नायिका आँचल शर्माले आफूले भट्टराईका अन्य कृति पढेको र यसले पनि सबैको मन छुने बताउनुभयाे । आफू पनि पुस्तक पढ्न आतुर रहेको उहाँको भनाई छ ।
कार्यक्रममा लेखक भट्टराईले यो पुस्तक पनि यसअघिका पुस्तकलाई जस्तै सबैले मन पराइदिनेमा आफू विश्वस्त रहेको बताउनुभयाे । साथै पुस्तक पढेर प्रतिक्रिया दिन उहाँले अनुरोधसमेत गर्नुभयो । कार्यक्रममा सांगीतिक प्रस्तुतिसमेत रहेको थियो । त्यसका लागि गायिकाहरु शीतल मोक्तान र सुवानी मोक्तानले गीत गाउनुभयाे । ‘आउ न माया गाँस न’, ‘तिमी बिनाको जीवन काँडा भो’आदि गीत गाउनु भएकाे हाे । पुस्तक फाइनप्रिन्टले बजारमा ल्याएको हो ।
