काठमाडाैं – अमेरिकी कम्पनीहरु पहिलेदेखि नै ड्रोन निर्माणमा पछि रहँदै आएका छन् । देशभित्रै ड्रोनका सबै पूर्जाहरु उत्पादन गर्न कठिन हुने गरेकाले पनि यिनीहरु विश्वबजारको प्रतिस्पर्धामा नआउने गरेको बताइएको छ । तर केही समय अगाडि मात्र स्थापित भएका दुई अमेरिकी कम्पनीहरुले चिनियाँ प्रविधिलाई हराउन लायक आविस्कार गरेको दाबी गरेका हुन् ।
विश्वव्यापी रुपमा अहिले चिनियाँ प्राविधिक कम्पनी ‘डिजेआइ’ सबैभन्दा लोकप्रिय रहेको छ । गत वर्ष सबैभन्दा धेरै कमाइ गरेको यस कम्पनीको ‘फ्यानटम’ नामक ड्रोनको बजारमा अत्याधिक माग हुने गरेको छ । उद्धार लगायतका सबै कार्यका लागि प्रयोग गर्न सकिने यो ड्रोनको मूल्य पनि केबल १५०० डलर मात्र रहेको छ । यसमा रहेका अत्याधुनिक फिचरहरुकै कारण यसको लोकप्रियता बढ्दै गएको बताइन्छ । त्यसकारण यसले लामो समयदेखि नै ड्रोनबजारमा एकछत्र राज गर्दै आफ्ना सबै प्रतिस्पर्धीलाई सजिलै हराइरहेको छ । अत्याधिक प्रतिस्पर्धाकै समस्यापछि पछिल्लो वर्ष विभिन्न अमेरिकी कम्पनीहरुले ड्रोन विक्री गर्न बन्द गरेका थिए ।
तर २०१७ मा भने डिजेआइले डाटा सुरक्षाको मुद्दामा आलोचित हुनु परेपछि अमेरिकामा यसमाथि प्रतिबन्ध लगाइएको थियो । फ्यान्टमले अवैधानिक तरिकाले चिनियाँ सरकारलाई गोप्य जानकारी दिइरहेको आरोप रहेको छ । तर कम्पनीले भने सो आरोप पूर्ण रुपमा गलत भएको ठहर गर्दै आएको छ । यस्तोमा अमेरिकी कम्पनीका लागि नयाँ अवसर प्राप्त भएकाले पनि पछिल्लो समय ड्रोन कम्पनीहरुले नयाँ आविष्कारमा जोड दिइरहेको सीएनएनले बताएको छ ।
यस्तोमा सिलिकन भ्यालीमा आधारित ‘इम्पोसिबल एरोस्पेस’ ले सोमबार दुई घण्टासम्म लगातार उडिरहन सक्ने ड्रोन विक्रीका लागि सार्वजानिक गर्ने बताएको हो । सामान्यतय ड्रोनहरु एकपटक चार्ज गरेपछि तीस मिनेटसम्म मात्र उड्न सक्छन् । यसको मूल्य ७५०० डलर रहेको बताइएको छ । त्यसैगरी अर्को सुरुवाती कम्पनी ‘स्काइडिओ’ ले निर्माण गरेको ड्रोनले पनि अवरोधकहरुबाट आफैँ बचेर थाहै नदिइ अनुसन्धान गर्न सक्ने बताएको हो । गत हप्ता लन्च भएको यो ड्रोनमा राम्रो गुणस्तरको तस्बिर र भिडियोलाई पनि बढी केन्द्रित गरिएको बताइएको छ ।
जसको मूल्य चाहिँ १९९९ डलर रहेको छ । यस्तोमा यी दुवै अमेरिकी कम्पनीले यी सबै विशेषता कार्यन्वयन गर्नमा सफल भए चिनियाँ कम्पनी डिजेआइसँग प्रतिस्पर्धा गर्न सक्ने बताइएको हो । यी कम्पनीहरुले यसअघिका भन्दा फरक प्रविधि अपनाएर ड्रोन निर्माण गरेको हुनाले पनि ठूलो अपेक्षा गरिएको बताइएको छ । ड्रोन बनाउनु भन्दो अगाडि यिनीहरुले ब्याट्री निर्माण गर्ने गरेका थिए ।
