काठमाडौं – अन्तर्राष्ट्रिय नेपाली साहित्य समाज (अनेसास)को आगामी कार्यकालको महासचिव पदमा गणेश घिमिरेले उम्मेदवारी दिने घोषणा गर्नुभएको छ । घिमिरेले ‘अनेसास’ केन्द्रीय कार्यसमिति (२०१८-२०२०) का लागि महासचिवमा उम्मेदवारी दिने घोषणा गर्नुभएको हो ।
साहित्यिक संस्था ‘अनेसास’ प्रबासमा रहेर नेपाली भाषा, साहित्य, कला र सस्कृतिको क्षेत्रमा काम गर्ने ठूलो संस्था हो । घिमिरेले संस्था भित्रको नराम्रो प्रवृतीको विरुद्ध आफ्नो उम्मेदवारी रहेको बताउनु भएको छ । राम्रो कामलाई राम्रो भन्न नसक्ने र नकारात्मक कुरा गरेर संस्थालाई बदनाम गर्ने प्रवृतीका विरुद्ध आफ्नो उम्मेदवारी रहेको उहाँको दावी छ । पर्थ च्याप्टरको संस्थापक अध्यक्ष तथा ‘अनेसास’ वर्तमान कार्यसमितिको सचिवको हैसियतमा काम गरिसकेको स्मरण गराउँदै उहाँले संस्थालाई जीवन्त राख्न पनि महासचिवमा उम्मेदवारी घोषणा गरिएको बताउँनुभयो ।
‘अनेसास’लाई अझ व्यवस्थित र संस्थाको उद्देश्य बमोजमको प्रभावकारी रुपमा बिकास गर्न आफू लागि परेको घिमिरेको भनाई छ । साथै सम्पर्क कार्यालय र च्याप्टरबीचको बलियो सम्बन्ध, संस्थाको विस्तार तथा नीतीगत रुपमा देखिएका समस्याको समाधानका लागि पनि आफ्नो प्रयास रहने उहाँले प्रतिवद्धता जनाउनुभयो ।
यसअघि एनआरएनए अस्ट्रेलिया भाषा साहित्यको संयोजक भएर काम गरिसकेको साथै अहिले एनआरएनए आईसिसी भाषा साहित्य उपसमितिको सदस्यको रुपमा काम गरिरहेकाले पनि एनआरएनए लगायत अन्य संघ-संस्थासँग सहकार्य गर्दै काम गर्न सजिलो हुने घिमिरेको विश्वास छ । आफू सदैव संस्थाप्रति उत्तरदायी रहने भन्दै उहाँले ‘अनेसास’ केन्द्रीय कार्यसमिति (२०१८-२०२०) का लागि महासचिवमा काम गर्ने अवसर दिन आग्रह गर्नुभएको छ ।
