काठमाडौं – साहित्यकारद्वय रामकुमार पाँडे र प्रकाश पौडेल ‘माइला’को संयुक्त हाइकुसङ्ग्रह ‘हजार हाइकु’ पुस्तक सार्वजनिक भएको छ । काठमाडौंमा एक कार्यक्रमबीच उक्त पुस्तक विमोचन गरिएको हो । उक्त हाइकु संग्रहलाई वरिष्ठ गीतकार रत्नशमशेर थापा, प्रा.डा. खगेन्द्रप्रसाद लुइटेल, दामोदर पुडासैनी र महेश पौडेल सार्वजनिक गर्नुभयो ।
बिमोचित पुस्तक माथि समिक्षा गर्दै समालोचक महेश पौडेलले ‘हजार हाइकु’ हाइकु मात्र नभई हाइकुको इतिहास र संरचनाको जानकारी समेत भएको बताउनुभयो । यस्तै समिक्षक दामोदर पुडासैनीले उक्त हाइकु सङ्ग्रह हाइकु प्रेमी तथा लेख्न र सिक्न चाहनेहरूको लागि पनि विशेष पढ्नैपर्ने पुस्तक भएको बताउनुभयो । वरिष्ठ समालोचक प्रा. डा. खगेन्द्रप्रसाद लुइटेलले दूई लेखकहरू हाइकुको राम्रो संरचना र मर्म बुझेका लेखक भएको र यो कृति आफैमा उत्कृष्ट र राम्रो संकलन भएको बताउनुभयो । 
कार्यक्रममा बोल्दै गीतकार रत्नसमशेर थापाले यो कृति नेपाली साहित्यको बजारमा हाइकु विधामा एक सशक्त र बलियो कोशेढुङ्गा सावित भएको बताउनुभयो । स्रष्टाहरु प्रकाश पौडेल ‘माइला’ र रामकुमार पाँडेले मन्तव्य राख्दै यो कृति जन्मनुको सन्दर्भबारे बोल्दै कृति भित्रबाट केहि हाइकु बाचन गर्नुभएको थियो । ‘माइला’ विगत १३ वर्षदेखि हाइकुको उदगम थलो जापान मै बसेर हाइकुबारे खोज र अनुसन्धानमा व्यस्त हुनुहुन्छ भने पाँडेले नेपालमा बसेर नेपाली हाइकुलाई नेतृत्त्व प्रदान गर्दै आउनुभएको छ ।
हाइकुको इतिहास, हाइकु संरचना र संयोजनका आधार सहित उत्कृष्ट हजार वटा हाइकु सङ्ग्रहित २ सय ६२ पेज रहेको यस पुस्तक ‘हजार हाइकु’ शिखा बुक्स बाट प्रकाशित र ज्ञानज्योति बुक्स पब्लिकेशनद्वारा वितरित गरिएको छ भने यसको मूल्य ३ सय २५ रुपैयाँ रहेको छ । *** 
