काठमाडौं – असार १४ गते सम्पन्न दोस्रो चरणको स्थानीय तह निर्वाचनको मतपरिणाम आउने क्रम जारी छ । प्रदेश नम्बर १, ५ र ७ का ३५ जिल्लाका ३ सय ३४ मध्ये २ सय ४८ स्थानीय तहको नतिजा सार्वजनिक भइसकेको छ ।
पछिल्लो नतिजा अनुसार एमालेले १०५ स्थानमा जित हासिल गर्दै अगाडी देखिएको छ भने कांग्रेसले ९७ स्थानमा जितेको छ । कांग्रेसले ३२ वटा नगरपालिकाको मेयर र उपमेयर जितेको छ भने एमालेले २४ वटा नगरपालिकाको मेयर र उपमेयर जितेको छ । तेस्रो स्थानमा रहेको माओवादी केन्द्रले भने अहिलेसम्म रोल्पा नगरपालिकामा मात्रै जितेको छ । गाउँपालिकामा ३२ स्थानमा जित निकालेको छ ।
यस्तै, संघीय समाजवादी फोरमले ६ स्थानीय तहमा जित हात पार्दा नेपाल लोकतान्त्रिक फोरमले ४, राष्ट्रिय जनमोर्चाले २ तथा राप्रपाले र स्वतन्त्र उम्मेदवारले १–१ स्थानीय तहमा जित हात पारेका छन् । नगर र गाउँपालिका दुवैमा एमाले केही अग्रस्थानमा छ । प्रदेश एक र ५ मा एमाले बलियो देखिएको छ भने प्रदेश नम्बर ७ मा नेपाली कांग्रेस अगाडी देखिएको छ ।
महानगरमा कांग्रेस अगाडी, उपमहानगरमा एमाले बलियो
विराटनगर महानगरपालिकासहित अन्य सात उपमहानगरपालिकामा पनि मतगणना जारी रहेको छ । बिहानसम्मको परिणाम अनुसार विराटनगर महानगरपालिकाको मेयरमा कांग्रेसको अग्रता कायमै छ । कांग्रेसलाई एमालेले पछ्याइरहेको छ ।
सात उपमहानगरपालिकामा भने एमालेको धेरै ठाउँमा अग्रता देखिएको छ । दाङका तुल्सीपुर र घोराही दुवै उपमहानगरपालिकामा एमालेका उम्मेदवार घनश्याम पाण्डे र नरुलाल चौधरी बलियो अवस्थामा देखिएको छ । सुनसरीको इटहरी र धरान नगरपालिकामा पनि एमालेकै अग्रता कायम छ ।
इटहरीमा द्वारिकलाल चौधरी र धरानमा तारा सुब्बा आआफ्ना निकटतम प्रतिस्पर्धीभन्दा हजार मतले अगाडि छन् । रुपन्देहीको बुटवल उपमहानगरपालिकामा पनि एमालेका उम्मेदवार शिवराज सुवेदीको अग्रता कायमै छ । कैलालीको धनगढी उपमहानगरपालिकाकामा भने कांग्रेसको अग्रता छ ।
कांग्रेसका उम्मेदवार नृपबहादुर बड केही मतअन्तरले स्वतन्त्र उम्मेदवार गोपाल हमालभन्दा अगाडि छन् । नृपबहादुरलाई एमालेका दुर्गप्रसाद जोशीले पनि पछ्याइरहेका छन् । बाँकेको नेपालगन्ज उपमहानगरपालिकामा भने राप्रपा डा. धवलशम्शेर राणाको अग्रता फराकिलो बन्दै गएको छ ।
