नेपालगन्ज – दोस्रो चरणको निर्वाचनका लागि चुनावी वातावरण बन्दै गएपछि मुस्लिम समुदायलाई भने कसरी भोट हाल्ने भन्ने चिन्ताले सताउन थालेको छ ।
मुस्लिम समुदायमा कठोर अनि निकै लामो पर्व मानिने रमजान आइतबारदेखि सुरु हुँदै छ । एक महिनासम्म दिनभर व्रत बसेर मुस्लिम समुदायले यो पर्व मनाउँछन् । यो समयमा उनीहरूले बिहान सूर्य उदाएपछि साँझ सूर्यास्त नहुँदासम्म मुखमा पानीसमेत हाल्दैनन् ।
‘यो निकै कठोर एवं हाम्रो समुदायको पवित्र पर्व हो । बिहानदेखि सूर्य नअस्ताउँदासम्म पानीसमेत नखाएर व्रत बस्नुपर्छ, धार्मिक नियम निकै कडा हुन्छ । त्यसमा पनि हाम्रो समुदायमा अझै कडाइ हुन्छ’, नेपालगन्जका व्यवसायी अब्दुल वाहिद मन्सुरीले भन्नुभयो,‘एकातिर देशमा चुनावको पर्व आएको छ, अर्कोतिर समुदायको यति ठूलो पर्व छ ।’
मुस्लिम समुदायले भोट नहालेरै भए पनि रमजान भने मनाउँछन् । व्रत तोड्नु भनेको यो समुदायका लागि एक ठूलो अपराधजस्तै मानिन्छ । २० वर्षपछि हुन थालेको स्थानीय तहको निर्वाचनमा कसरी भोट हाल्न सजिलो होला भन्ने चिन्ता अहिले मुस्लिम समुदायमा छ ।
‘हामी चुनावमा सहभागी हुन चाहन्छौं तर दिनभरि भोकै बसेर हामी कसरी भोट गर्न सक्छौं ? त्यसमाथि अझ महिला अनि वृद्धवृद्धालाई झनै गाह्रो हुन्छ,’ नेपालगन्ज १४ का डा। मोहम्मद आरिफ खानले भन्नुभयो, त्यसका लागि सरकार र निर्वाचन आयोगले केही सजिलो व्यवस्था गरिदिए राम्रो हुने थियो ।’
देशको सबैभन्दा गर्मी हुने ठाउँ हो, बाँके । दिनभरि पानीसमेत नखाएर व्रत बस्ने भएका कारण घन्टौं लाइनमा बसेर भोट हाल्न गाह्रो हुने उहाँ बताउनुहुन्छ । राष्ट्रिय जनगणना २०६८ अनुसार मुस्लिमको जनसंख्या देशभर करिब ११ लाख ६४ हजार छ । त्यसमध्ये ११ लाख ७ हजारभन्दा बढीको (करिब ९५ प्रतिशत) बसोबास तराईका जिल्लामा छ ।
दोस्रो चरणमा १, २, ५ र ७ नं प्रदेशमा चुनाव हुँदै छ । दोस्रो चरणको चुनावको प्रक्रिया र प्रचारप्रसार जोडतोडका साथ हुने समयमै मुस्लिम समुदायको पर्व रमजान सुरु हुँदै छ । बिहान ४ देखि साँझको सात बजेसम्म पानीसमेत नखाएर बस्ने कठोर व्रतबीच मुस्लिम समुदायका मतदातालाई चुनावमा भोट खसाल्न जानु कम्ता जोखिम छैन ।
