काठमाडौँ – दीपायलस्थित सेनाको सुदूरपश्चिम पृतनाबाट हतियार गायब भएको छ ।
पृतनाले भने त्यसबारे यकिन जानकारी सार्वजनिक गरेको छैन । सर्ट मेसिन गन (एसएमजी) एक थान र दुईवटा लोडेड म्याग्जिन हराएको सैनिक स्रोतले जनाएको छ । स्रोतका अनुसार आइतबारदेखि घटनाबारे अनुसन्धान सुरु भएको आजको कान्तिपुर दैनिकमा खबर छ ।
यसअघि स्थानीय सञ्चारमाध्यममा हतियारसहित जवान भागेको समाचार प्रकाशन/प्रसारण भएको थियो । उक्त समाचारप्रति सेनाले आपत्ति जनाएको थियो । पृतनाभित्रबाट कुनै पनि जवान गायब नभएको तर हतियारबारे छानबिन भइरहेको स्रोतको भनाई छ ।
हातहतियार गणना तथा जाँच भइरहेकै बेला सेनाले काठमाडौँबाट विशेष टोलीलाई हेलिकप्टरमा झिकाएर अनुसन्धान तीव्र बनाएको छ ।
