काठमाडौँ – बङ्गलादेश विरुद्धको हुने दुई मैत्रिपूर्ण फुटबल खेलका लागि २१ सदस्यीय नेपाली राष्ट्रिय फुटबल टोलीको घोषणा गरिएको छ ।नेपाली राष्ट्रिय टोलीका मुख्य प्रशिक्षक ग्याटुकी कोजीले प्रशिक्षणमा रहेका २९ खेलाडी मध्येबाट २१ जनाको अन्तिम छनौट गरेका हुन् ।
नेपाली टोलीको कप्तानीको जिम्मा स्ट्राइकर अनिल गुरुङलाई दिइएको छ । बिराज महर्जन भने उपकप्तान रहेका छन् ।अखिल नेपाल फुटबलसंघ एन्फाका अनुसार नेपालले बङ्गलादेशसँग यही असार ३१ र साउन २ गते ढाकामा दुई मैत्रिपूर्ण फुटबल खेल्ने छ ।
बङ्गलादेश विरुद्धको मैत्रिपूर्ण खेललाई आगामी नोभेम्बर २ देखि १५ सम्म हुने एएफसी सोलिडारिटी कपको तयारीको रूपमा लिइएको छ ।आज छनोट गरिएका खेलाडीहरुमा ३ गोलकिपर, ९ डिफेण्डर, ५ मिडफिल्डर र ४ स्ट्राइकर छन् । नेपाली टोलीको प्रशिक्षकमा राजुकाजी शाक्य र गोलकिपर प्रशिक्षकमा उज्वल मानन्धर छन् ।
छनोट भएका खेलाडीहरुमा
गोलकिपमा किरण कुमार लिम्बु, बिकेश कुथु र विशाल श्रेष्ठ
डिफेण्डरमा बिराज महर्जन, दिनेश राजबंशी, अनन्त तामाङ, आदित्य चौधरी, जीतेन्द्र कार्की, देभेन्द्र तामाङ, रविन श्रेष्ठ, रञ्जित धिमाल र मानबहादुर तामाङ
मिडफिल्डरमा सुजल श्रेष्ठ, विशाल राई, राजेन्द्र रावल, अञ्जन विष्ट र सुमन लामा
स्ट्राइकरमा नवयुग श्रेष्ठ, भरत खवास, रञ्जन विष्ट र कप्तान अनिल गुरुङ रहेका छन्
