खुट्टामा चप्पल नहुनेहरु
पजेरो चढेर हिंडे
एक आना जग्गा नहुनेहरुले
आलिशान वंगला किने
हिजोसम्म खद्दरको लुगा लाउँथे
आज व्रिटिस टाई लाउँछन्
देश घिसारेर दिल्ली पुर्याए
तैपनि राष्ट्रियताको गीत गाउँछन्
यस्ता हुतिहारा नेताहरुलाई
बल्ल मैले चिनें
तपाई नै भन्नुस् अब
म किन भोट दिने ?
जनतालाई बलिको बोको बनाई
पुर्याए आफ्नो धोको
हेर्ने फुर्सद छैन यिनलाई
जनताको मन रो’को
संविधान र पहिचान दिन्छु भन्दै
आश्वासनको पोको वाँड्ने
संविधान लेख्ने बेलामा
आफ्नो गति छाड्ने
जनताको संविधान लेख्ने बेला
दिल्ली र वेइजिङ्ग डुल्न हिंडे
यस्ता फिरन्ते नेतालाई
तपाई नै भन्नुस् अब
म किन भोट दिने ?
यी नेताहरुले संविधान बनाउँदैनन्
यिनीहरुलाई संविधान चाहिएकै छैन
देशलाई माया गर्ने देशभक्त नेता
एउटा पनि पाइएकै छैन
कमाई खाने केही छैन
महंगीले आकाश छोएको छ
सँधै बन्द, हडताल र जुलुस
जनताको मन रोएको छ
बनाउन र दिन जानेकै छैनन्
पाए उल्टै देशकै लिने
तपाई नै भन्नुस् अब
यस्ता ठगी खान पल्केकाहरुलाई
म किन भोट दिने ?
