फ्रान्स– फ्रान्सको पेरिस स्थित एसिस्टेन्स मेडिकेल टोइट ड्यू मोन्डे तथा नेपाली राजदूतावास, पेरिसको संयुक्त आयोजनामा गत शनिवार धन्यवाद ज्ञापन साँझको आयोजना गरिएको छ ।
कार्यक्रममा फ्रान्सका लागि नेपाली राजदूत तथा युनेस्कोका नेपाली स्थायी प्रतिनिधि मोहनकृष्ण श्रेष्ठले सो संस्थाका दाताहरुलाई धन्यवाद दिनुहुंदै सहयोगको लागि प्रशंसा पनि गर्नुभयो । नेपालको प्राकृतिक सौन्दर्य, उत्कृष्ट संस्कृति तथा विविधतामा एकताको सूत्रमा बाँधिएर आएका नेपाली जनताको रहनसहनका बारेमा पनि उहाँले चर्चा गर्नुभयो ।
फ्रान्स र नेपाल बीचको सुमधुर सम्बन्धमा प्रकाश पार्दै श्रेष्ठले दुई सय वर्ष भन्दा अगाडिदेखि दुई देशबीच सम्बन्ध रहेको र २० अप्रिल १९४९ मा दौत्य सम्बन्ध स्थापना भई समयको प्रवाह संगै सम्बन्धको विकास हुँदै आएको उल्लेख गर्नुभयो । सन् १९८३ मा फ्रान्सका दिवंगत राष्ट्रपति फ्रान्स्वा मितराँबाट नेपालको भ्रमण सम्पन्न भएको स्मरण गर्नुभयो ।
संस्थाका अध्यक्ष लाउरेन्ट कार्वोनियरले दाताहरुलाई धन्यवाद दिई एएमटीएमको क्रियाकलापहरुका बारेमा वर्णन गर्नुभएको थियो ।
पाहुनाहरुको लागी नेपाली खाना परिकारहरु राजदूतावासबाट तयार गरेको तथा सुश्री अलिशा गुरुङले नेपाली नृत्य प्रस्तुत गर्दा सबै पाहुनाहरु खुशी भै झुम्मिएर अवलोकन गरेका थिए ।
फ्रान्स तथा नेपाली सामानहरुका सानो बजार पनि आयोजना गरिएको र एएमटीएमका सदस्यहरुको व्याण्डले रमणीय संगीत बजाई कार्यक्रममा रौनकता थपेका थिए । सो अवसरमा सो संस्थाका ३२० जना व्यक्ति तथा उहाँहरुका परिवारजनको उपस्थिति थियो ।
सन् १९९४ मा म्याडम एभेलियन कार्बोनियरले स्थापना गर्नुभएको सो संस्थामा हाल डाक्टर तथा मेडिकल विधाका अन्य ३ हजार व्यक्तिहरु सदस्य छन् । सो संस्थाबाट प्रत्येक वर्ष १००० जना विभिन्न स्थानबाट छानिएका नेपाली विद्यार्थीहरुलाई वार्षिक २४० युरोको दरले छात्रबृत्ति दिंदै आएको छ । साथै वर्षको २ पल्ट नेपालमा संस्थाका डाक्टरहरुले करिव १४००/१५०० विरामीहरुलाई नि:शुल्क स्वास्थ्य सेवा दिंदै आएको छ । ***
