ललितपुर- इतिहास संशोधन मण्डल तथा साहित्यकार अमर न्यौपानेलाई क्रमशः जगदम्बा श्री र मदन पुरस्कार प्रदान गरिएको छ ।
मदन पुरस्कार गुठीद्वारा आयोजित कार्यक्रममा संशोधन मण्डलका तर्फबाट दिनेशराज पन्त र साहित्यकार न्यौपानेलाई सो पुरस्कार तथा सम्मान प्रदान गरिएको हो ।
लामो समयदेखि इतिहास सच्याउने काम गर्दै आएको संशोधन मण्डल र ‘सेतो धरती’ उपन्यासका लागि न्यौपानेलाई ती पुरस्कार प्रदान गरिएका हुन् ।
कार्यक्रममा सम्मानित हुनुहुने इतिहासकार दिनेशराज पन्तले संशोधन मण्डलले गर्दै आएको इतिहास परिमार्जन र साहित्य सेवाबारे चर्चा गर्नुभएको थियो ।
यसैगरी सम्मानित हुने अर्का साहित्यकार न्यौपानेले आफूलाई प्रदान गरिएको सम्मानले युवा वर्गलाई साहित्यतर्फ लाग्न प्रेरणा मिल्ने बताउनुभयो ।
गुठीका अध्यक्ष कमलमणि दीक्षितले साहित्य सिर्जना गर्न श्रम गर्नुपर्ने, जे पायो त्यही लेखेर साहित्य नबन्ने बताउनुभयो । ***
