सडक अझै अपूर्ण
सोलुखुम्बु– फाप्लु—जन्तरधाप सडकको सिस्नेरीखण्डमा एक सय मिटर ट्र्याक खोल्नका लागि १० करोड रुपैयाँभन्दा बढी खर्च भइसक्दा पनि अझै बाटो सम्पन्न भइसकेको छैन ।
ओखलढुङ्गा र सोलुखुम्बुलाई जोड्ने मुख्य सडकअन्तर्गत पर्ने तिंला गाविसको सिस्नेरी भीरमा रहेको सय मिटर ट्र्याक खोल्न तथा त्यहाँको पहिरो पन्छाउन सरकारले पटकपटक गरी १० करोड रुपैयाँभन्दा बढी खर्च गरेको हो ।
सोलुखुम्बुस्थित ड्रिलिप कार्यालयका सबइन्जिनियर वेदराज थापाका अनुसार आर्थिक वर्ष २०६३/०६४ देखि निर्माण सुरु गरिएको यो सडकखण्डमा ०६४/०६५ मा एक करोड, ०६५/०६६ मा डेढ करोड, ०६७/०६८ मा एक करोड र ०६८/६९ मा सात करोड खर्च भइसकेको छ । त्यसबीचमा मर्मतका लागि सानो आकारको बजेटसमेत खर्च भएको भनिए पनि कार्यालयमा त्यसको तथ्याङ्कसमेत भेट्न सकिँदैन ।
यस वर्ष पनि असारको सुरुदेखि नै सो सडकखण्डमा पहिरो गएका कारण मर्मतका लागि एक करोड रुपैयाँभन्दा बढी लाग्ने प्राविधिकको अनुमान छ । यस वर्षदेखि भने फाप्लु–जन्तरधाप सडकमार्ग सडक विभागलाई जिम्मा लगाएका कारण सडक विभागले नै मर्मत सुधार गर्ने जिल्ला विकास समितिका योजना अनुगमन तथा प्रशासकीय अधिकृत तुलराज सुनुवारले बताउनुभयो ।
दसँैताका ठूलो धनराशि खर्च गरेर सडकको मर्मत गरी जसोतसो यातायातका साधन चलाए पनि मनसुन सुरु हुनासाथ पहिरो गइहाल्छ । पाँच वर्षदेखि सिस्नेरी खण्डको सय मिटर सडक यसैगरी चलिरहेको छ ।
स्थानीयवासीले भने सो सय मिटर पहिरो स्थानीय ठेकेदार र राजनीतिक दलका लागि कमाइ गर्ने माध्यम बनिरहेकाले त्यसको विकल्प खोज्न कोही पनि तयार नभएको आरोप लगाएका छन् । वर्षा लाग्नसाथ पहिरो जानथाल्छ र पैदल हिँड्नसमेत मुस्किल पर्छ । यही पहिरोका कारण वर्षा लाग्नसाथ ढुवानीका साधन चल्न छाडेर सदरमुकाममा महँगी ह्वात्तै बढ्ने गरेको छ ।
