काठमाडौं- आफू अध्यक्ष रहेको संवैधानिक समिति अन्तर्गतको विवाद समाधान उपसमितिमा सहमति भएका विषयमा पार्टीभित्र विवाद भएपछि माओवादी अध्यक्ष एवं उपसमिति संयोजक पुष्पकमल दाहाल ‘प्रचण्ड’ उपस्थित हुन छाडेका छन् ।प्रचण्ड लगातार दुइटा बैठकमा उपस्थित भएका छन् । पार्टीको आन्तरिक काममा व्यस्त भनिए पनि आफूले सहमति गरेका विषयमा उपाध्यक्ष मोहन वैद्य समूहले विरोध गरेपछि उनले उपस्थित हुन छाडेका हुन् ।
नयाँ संविधानमा जनयुद्ध राख्ने पार्टी अडान छाडेर सशस्त्र संघर्ष शब्द राख्न सहमति जनाएपछि विवाद चुलिएको थियो । यसैबीच दाहालले उपसमितिमा आफूलाई मानमर्दन भएको भन्दै निकटवर्तीसँग छलफल गरेका छन् ।
वैद्य समूहका नेता देव गुरुङलगायत आफूलाई अध्यक्ष नै नमान्ने तरिकाले प्रस्तुत भएको भन्दै मुख देखाउने अवस्थामासमेत नरहेको बताएका छन् ।
यसैबीच सिंहदरबारस्थित कार्यालयमा बसेको बैठकमा उपसमितिका सदस्यहरुबीच नयाँ संविधान लेखनका क्रममा देखिएका विवादित बुँदाको बारेमा छलफल भएपनि थप विषयमा सहमति जुटाउन असफल भयो ।
बैठकमा संविधानको प्रस्तावना र परिवर्तनीय र अपरिवर्तनीय धाराको बारेमा छलफल भएको थियो । दलहरुबीच नयाँ संविधानमा परिवर्तनीय धारा राख्ने कि नराख्ने विषयमा विवाद भएपछि बैठकमा थप विषयमा सहमति जुट्न नसकेको हो ।
राज्य पुनर्संरचना बाहेकका संवैधानिक अदालत गठन, शासकीय स्वरुप लगायत ११ वटा बुँदामा दलहरुबीच विवाद कायमै छ । यद्यपी एकीकृत माओवादी वरिष्ठ उपाध्यक्ष मोहन वैद्य समूहका नेताहरुले उपसमितिले सहमति गरेका विषयमा फेरि छलफलको आवश्यकता औंल्याउन थालेका छन् ।
उपसमितिले गरेका सहमतिलाई अनुमोदनको लागि हिजो बसेको संवैधानिक समितिको बैठकमा माओवादी लगायत अन्य केही दलका नेताहरुले उपसमितिले गरेका सहमतिबारे फेरि छलफल हुनुपर्ने बताएका थिए ।
उपसमितिको बैठक आगामी शनिबार फेरि बस्नेछ । बैठकको अध्यक्षता एमाले नेता माधवकुमार नेपालले गरेका थिए ।
