काठमाडौं- नेपाली सेनासँग सल्लाह नगरी छुट्टै बटालियन बनाएर तीन हजार मधेसी भर्ना गर्न गरेको निर्देशनपछि असन्तुष्ट प्रधासेनापति छत्रमान सिंह गुरुङले बिहीबार बिहान राष्ट्रपति रामवरण यादवसँग भेट गरेका छन् ।प्रधानसेनापतिले सेनाका परमाधिपति समेत रहेका यादवलाई भेटेर सरकारी निर्णयप्रति असन्तुष्टि जनाएका छन् । मधेसी समुदायका लागि मात्र भर्ना खोल्ने सरकारी निर्णयबाट नेपाली सेना असन्तुष्ट रहेको उनको भनाइ थियो । मन्त्रिपरिषद्को मंगलबारको बैठकले शाहीकालमै स्वीकृत ३ हजार ४० दरबन्दीमा अर्थ मन्त्रालयबाट बजेट निकासा गरी मधेसी र मधेसी मूलका आदिवासी, दलितलगायतलाई भर्ना गर्न रक्षा मन्त्रालयलाई निर्देशन दिएको थियो ।
प्रधानसेनापति छत्रमानसिं गुरुङले यो विषयलाई लिएर बुधबार बिहान प्रधानमन्त्री बाबुराम भट्टराईलाई बालुवाटारमा भेटेका छन् । स्रोतका अनुसार भट्टराईले निर्णयबारे प्रष्ट जानकारी दिएनन् ।
