काठमाडौं- लामो समय गीत लेखनपछि गायनमा लागेकी गायत्री थापाले आफ्नो लोक पप गीत ‘कल गर मायालु मिस कल नगर…’ बिहीबार रिलिज गरेकी छन् । गीतसँगै उनले यसको म्युजिक भिडियो पनि सार्वजनिक गरेकी छन् ।
थापाले यो गीतको म्युजिक भिडियो सामाजिक सञ्जालमार्फत रिलिज गरेकी हुन् । रिलिज भएको केही घन्टामा ३ हजारभन्दा बढी दर्शकले सामाजिक सञ्जालमा यो गीतको म्युजिक भिडियो हेरेपछि उनी अहिले दंग परेकी छन् । आफ्ना विगतको गीतको भिडियोभन्दा यो भिडियो छोटो समयमा दर्शकले बढी मन पराएको उनले बताइन् ।
म्युजिक भिडियोलाई डब्बु क्षत्रीले निर्देशन गरेका हुन् । निकै महँगो खर्चमा तयार गरिएको यो म्युजिक भिडियोमा अभिनेता गजित विष्ट र अभिनेत्री सुष्मा कार्कीले आइटम डान्स गरेका छन् । राशी भण्डारीले कोरियोग्राफी गरेको यो भिडियो निरोज श्रेष्ठले खिचेका हुन् । मित्र गुरुङले सम्पादन गरेको यो लोक आइटम भिडियो चलचित्रको आइटम गीतभन्दा कम नबनेको सञ्चारकर्मीको प्रतिक्रिया छ ।
