काठमाडौँ – फिल्म ‘एक्टरः टेक वन’ को ट्रेलर राजधानीमा आयोजित विशेष कार्यक्रममार्फत सार्वजनिक भएको छ। यो ट्रेलरले त्रिकोणात्मक प्रेमकथा र द्वन्द्वको कथा प्रस्तुत गर्न खोजेको छ। ट्रेलरमा प्रदीप खड्का, आना शर्मा, दिव्या रायमाझी र राजबल्लभ कोइरालाको विशेष झलक देख्न सकिन्छ। प्रदीप खड्का एक महत्वाकांक्षी पात्रको भूमिकामा छन्। जसले आफ्नो लक्ष्य हासिल गर्न अनेक चुनौतीहरूसँग लड्नुपर्छ। राजबल्लभ कोइराला भने ग्रे क्यारेक्टरमा छन् । जसले कथामा षड्यन्त्र र द्वन्द्वको माहोल सिर्जना गर्छन्।
यो फिल्म राजन भुसालको निर्देशनमा निर्माण भएको हो र माघ १६ गतेबाट प्रदर्शनमा आउनेछ। निश्चल बस्नेतको भूमिकालाई ट्रेलरले गोप्य राख्दै कथामा रहस्य थपेको छ। मुख्य कलाकारहरूमा राजबल्लभ, प्रदीप, आना, र दिव्याका साथै दिव्य देव, उषा रजक, सुशील सिटौला पनि समावेश छन्। दस वर्षपछि पर्दामा फर्किएका राजबल्लभ र दिलीप रायमाझीकी छोरी दिव्याले डेब्यू गरेको हुनाले पनि चलचित्र प्रेमीहरु यो फिल्मको रिलिजको पर्खाइ मा छन्।
