रविविरुद्ध आज दर्ता गर्ने भनिएको मुद्दा रोकियो

समाचार सुन्नुहोस : 

काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध सहकारी ठगी प्रकरणमा रुपन्देहीमा दर्ता गरिनुपर्ने मुद्दा आज प्राविधिक कारणले स्थगित भएको छ। जिल्ला सरकारी वकिलको कार्यालय, रुपन्देहीले अन्तिम तयारी पुगे पनि केही प्राविधिक कारणका कारण आज मुद्दा दर्ता गर्न नसकिने जानकारी दिएको छ।

लामिछानेसहित अन्यविरुद्ध बुटवलस्थित सुप्रिम बचत तथा ऋण सहकारी संस्थाको कोष अपचलन प्रकरणमा मुद्दा दर्ता गर्ने तयारी भइरहेको थियो। सहकारीका १०,३९१ सदस्यले जम्मा गरेको १ अर्ब ३१ करोड रुपैयाँमध्ये ८६ करोड १८ लाखभन्दा बढी अपचलन भएको दाबी छ। अपचलित रकममध्ये १४ करोड रुपैयाँभन्दा बढी गोर्खा मिडिया नेटवर्कमा गएको आरोप समेत लागेको छ।

सरकारी वकिल कार्यालयले सम्बन्धित कानुनी प्रक्रियालाई अघि बढाउन प्रयास जारी राखेको जनाएको छ।