टोकियो – पछिल्लो वर्ष जापानमा कीर्तिमानी सङ्ख्यामा पर्यटकहरूले भ्रमण गरेका छन् । कमजोर येन र यहाँको सांस्कृतिक विशेषताले पर्यटकहरूलाई आकर्षित गरेको हो ।
क्योतोजस्ता स्थानमा भीडभाडका गुनासा बीच पर्यटक आगमनको संख्या उल्लेखनीय रूपमा वृद्धि भएको सार्वजनिक आँकडाले देखाएको छ । जापान राष्ट्रिय पर्यटन संगठनका अनुसार सन् २०२४ मा जापानमा ३६ दशमलव ८ मिलियन भन्दा बढी पर्यटकहरू पुगेका थिए । यो संख्याले सन् २०१९ को झण्डै ३२ मिलियनको रेकर्ड तोड्दै नयाँ कीर्तिमान बनेको हो ।
यो वृद्धि मुख्यतः दशकभन्दा लामो समयअघि सुरु भएको पर्यटन बूमको पुनरागमन हो, जुन कोविड १९ महामारीका कारण केही समय रोकिएको थियो । सन् २०१२ को तुलनामा यो संख्या चार गुणाले बढेको छ । यसका केही कारणमध्ये सरकारद्वारा माउन्ट फुजीका मनोरम ढलानदेखि दुर्गम क्षेत्रका मन्दिर र सुशी बारहरूजस्ता आकर्षणहरू प्रवर्द्धन गर्ने नीति तथा कमजोर येन पनि हुन् ।
पछिल्लो तीन वर्षमा येन अन्य मुद्रासँग तुलनामा कमजोर हुँदा जापानका विभिन्न सेवा र उत्पादनहरू जस्तै रामेन् र हस्तनिर्मित जापानी भान्साका चक्कु सस्तो भएका छन् । सरकारले सन् २०३० सम्ममा पर्यटक संख्या झण्डै दोब्बर गरी ६० मिलियन पुर्याउने महत्वाकांक्षी लक्ष्य राखेको छ ।
