समाचार सुन्नुहोस :
काठमाडौँ – राष्ट्रिय सभा सदस्य वामदेव गौतमले संविधान संशोधन गरेर ऐन तथा कानूनहरूबाट “दलित” शब्द हटाउनुपर्ने प्रस्ताव गरेका छन्। बिहीबार विकास, आर्थिक मामिला तथा सुशासन समितिको बैठकमा बोल्दै उनले दलित शब्द नहटाएसम्म यो समुदायमाथिको भेदभाव पूर्ण रूपमा अन्त्य गर्न नसकिने धारणा व्यक्त गरे।
गौतमले सामाजिक भेदभाव र छुवाछुत अन्त्य गर्न केवल बहस र छलफल पर्याप्त नभएको उल्लेख गरे। उनले विगत २० वर्षदेखि दलित समुदायले अन्याय झेल्दै आएको बताएर सरकारले क्षतिपूर्तिको व्यवस्था गर्नु आवश्यक भएको बताए। उनका अनुसार “दलित” शब्दले नै विभाजन झल्काउँछ। त्यसैले यसलाई संविधान, ऐन, कानुन र अन्य दस्तावेजहरूबाट हटाउनु आवश्यक छ। गौतमले भने, “हामीले संविधान बनाउँदा ख्याल गर्न नसकिएको कुरा अब सुधार गर्नुपर्छ। दलित शब्द हटाएर सबैलाई समान दृष्टिकोणले हेर्नु पर्छ।”
बैठकमा अधिकांश सांसदहरूले दलित समुदायका अधिकार सुनिश्चित गर्ने र विकाससम्बन्धी विधेयक छिटो ल्याउनुपर्ने मागसमेत अघि सारेका छन्।
