समाचार सुन्नुहोस :
काठमाडौँ – नेपाल उद्योग परिसंघले सरकारी तथा सार्वजनिक निकायहरूमा स्वदेशी वस्तुको प्रयोग अनिवार्य गर्ने नेपाल सरकारको पछिल्लो निर्णयको स्वागत गरेको छ। परिसंघले यो निर्णयले स्वदेशी उत्पादनको प्रवर्द्धनमा ठूलो योगदान पुर्याउने विश्वास व्यक्त गरेको छ।
मंसिर २८ गते मन्त्रिपरिषद्को बैठकले पारित गरेको ‘सार्वजनिक निकायमा स्वदेशी वस्तुको प्रयोग गर्ने निर्देशिका, २०८१’ ले समग्र निजी क्षेत्रलाई उत्साहित बनाएको परिसंघले जनाएको छ। उद्योग, वाणिज्य तथा आपूर्ति मन्त्रालयको सिफारिसमा ल्याइएको यो निर्देशिकाले स्वदेशी अभियानलाई थप ऊर्जा दिने अनुमान गरिएको छ।
‘मेक इन नेपाल’ अभियानअन्तर्गत परिसंघले सरकारसँग मिलेर स्वदेशी वस्तु तथा सेवाको उत्पादन, उपभोग र निर्यात प्रवर्द्धनमा ध्यान दिइरहेको छ। २०७७ फागुनमा औपचारिक रूपमा सुरु गरिएको यो अभियान सरकारसँगको सहकार्यमा अघि बढाइएको छ। परिसंघले २०७८ असारमा उद्योग मन्त्रालयसँग साझेदारीपत्रमा हस्ताक्षर गर्दै यो अभियानलाई संस्थागत गरेको हो।
परिसंघका अनुसार सरकारको यो निर्णयले स्वदेशी वस्तुको प्रयोगलाई व्यापक बनाउन र स्वदेशी उद्योगहरूको विकासका लागि विशेष योगदान दिनेछ। साथै, स्वदेशी अभियानका लक्ष्यहरू हासिल गर्न यसले महत्वपूर्ण प्रभाव पार्ने अपेक्षा गरिएको छ।
