काठमाडौं – छोटा भिडियो सेयर गर्न मिल्ने प्लेट फर्म टिकटक नेपालमा दर्ता हुने भएको छ । सामाजिक सञ्जालको प्रयोगलाई व्यवस्थित गर्ने सम्बन्धी निर्देशिका, २०८० अनुसार सञ्चार तथा सूचना प्रविधि मन्त्रालयमा टिकटक दर्ता हुने भएको हो ।
सञ्चार मन्त्रालयका प्रवक्ता गजेन्द्रकुमार ठाकुरका अनुसार टिकटकका प्रतिनिधिले आइतबार मन्त्रालयमै पुगेर दर्ता प्रक्रियाका लागि आवश्यक कागजात बुझाएका हुन् । निर्देशिकाको तीन नम्बर बुँदामा सामाजिक सञ्जालका कम्पनी सञ्चार मन्त्रालयमा सूचीकरण गर्नुपर्ने व्यवस्था छ । टिकटकले बुझाएका कागजातको अध्ययन गरी प्रक्रियाअनुरुप दर्ता स्वीकृत गरी सूचीकरण गरिने प्रवक्ता ठाकुरले बताए । निर्देशिकाको बुँदा नम्बर ६ मा यसरी सूचीकरण हुने कम्पनीले गुनासो व्यवस्थापनका लागि ‘पोइन्ट अफ कन्ट्रयाक्ट्र’ को व्यवस्था गर्नुपर्छ । यसरी दर्ता भएका र नेपालमा कार्यालय नरहेका सामाजिक सञ्जाल कम्पनीले तीन महिनाभित्र कार्यालय खोल्ने वा सम्पर्क व्यक्ति तोक्नुपर्ने ब्यवस्था निर्देशिकामा छ ।
टिकटक सूचीकरण भएसँगै उसले निर्देशिका अनुसार नेपालमा गुनासो व्यवस्थापन एवं आवश्यक सम्पर्कका लागि कार्यालय खोल्ने वा सम्पर्क व्यक्ति तोक्ने अपेक्षा गरिएको छ । गत वर्षको मंसिरमा टिकटकमाथि नेपालमा प्रतिबन्ध लागेको थियो । करिब नौ महिनापछि गत भदौमा प्रतिबन्ध हटाइएको थियो । त्यसबीचमा कम्पनीले नेपालको नीति नियम मान्ने र सबै गुनासो सम्बोधन गर्न तयार रहेको बताएको थियो । नेपालमा सञ्चालनमा रहेका तर कार्यालय नरहेका कम्पनी ठूला करदाता कार्यालयमा दर्ता भएर डिजिटल सेवा कर तिर्दै आएका छन् । सोहीअनुसार पहिले नै दर्ता रहेको टिकटक अब सामाजिक सञ्जालको प्रयोगलाई व्यवस्थित गर्न बनेको निर्देशिका अनुसार सूचीकरण हुन तयार भएको हो ।
टिकटकद्वारा बाढी सम्बन्धि जानकारी दिने एप फिचर सुरु
नेपालमा हालै आएको विनाशकारी बाढी र पहिरोको प्रतिक्रियास्वरूप, टिकटकले प्रयोगकर्ताहरूलाई समयमै सही सूचनाको पहुँच सुनिश्चित गर्न इन-एप फिचर सुरु गरेको छ । यस फराकिलो प्लेटफर्मको फाइदा उठाउँदै, टिकटकले अब नेपाली र अंग्रेजी दुवै भाषामा बाढीसंग सम्बन्धित किवर्डहरू खोज्ने प्रयोगकर्ताहरूलाई नेपाल सरकारको गृह मन्त्रालय अन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणको आधिकारिक वेबसाइटमा निर्देशित गर्ने छ । यसबाहेक, व्यक्तिगत र सामुदायिक सुरक्षाको बारेमा थप जानकारी र सुझावहरूका लागि, प्रयोगकर्ताहरूले दुःखद सुरक्षा केन्द्र मार्फत जान सक्छन् । त्यस्ता इन-एप पहलहरूले प्रयोगकर्ताहरूले प्रत्यक्ष रूपमा विश्वसनीय स्रोतहरूबाट प्रमाणित अपडेटहरु र निर्देशनहरू प्राप्त गरी, प्राकृतिक प्रकोपको समयमा सुरक्षा सुनिश्चित गर्ने जनाइएको छ । बिशेषतःआपतकालिन अवस्थामा, भ्रम वा सम्भावित खतरा निम्त्याउन सक्ने गलत सूचनाको प्रसारलाई न्यूनीकरण गरेर टिकटक आफ्ना प्रयोगकर्ताहरूको सुरक्षालाई प्राथमिकता दिन प्रतिबद्ध रहेको जनाइएको छ । प्राधिकरणको आधिकारिक जानकारीमा बाढी जस्ता प्राकृतिक प्रकोपहरू बारे खोजीहरू सहजीकरण गरेर, टिकटकले प्रयोगकर्ताहरूलाई विशेष गरी नेपालको बाढी-प्रवण क्षेत्रहरूमा संकटको समयमा र पछि सूचित निर्णयहरु गर्ने कुरा सुनिश्चित गर्ने जनाइएको छ ।
टिकटक सामाजिक सञ्जालको एउटा यस्तो सशक्त प्लेटफर्म हो, जसले प्रयोगकर्ताहरूलाई छोटा-छोटा भिडियोहरू बनाई शियर गर्न सकिने सुविधा उपलब्ध गराएको हुन्छ । यो प्लेटफर्म विशेषगरी मनोरञ्जन, नृत्य, कमेडी र सूचनामुलक भिडियोहरूका लागि संसारभरि लोकप्रिय हुँदै गईरहेको छ । टिकटक चिनियाँ कम्पनी बाइट-डान्सद्वारा सन् २०१६ मा लञ्च गरिएको सामाजिक सञ्जालको एप हो । यसमा प्रयोगकर्ताहरूले १५ सेकेन्डदेखि ३ मिनेटसम्मका भिडियोहरू पोस्ट गर्न सक्छन् । विशेष गरी युवाहरूमा यसको प्रभाव ठूलो छ । टिकटकले तात्कालिन समयमा चल्तीका सामाजिक तथा साँस्कृतिक रुझानहरुको अवस्था बारे वास्तविक जानकारी गराउन महत्वपूर्ण भूमिका खेलिरहेको हुन्छ ।***
