समाचार सुन्नुहोस :
काठमाडौँ – शिक्षा, विज्ञान तथा प्रविधि मन्त्री विद्या भट्टराईले विश्वविद्यालयमा भइरहेको गुण्डागर्दीलाई राजनीतिक समर्थन नदिइने कुरा प्रस्ट्याएकी छिन्। आज बिहान भरतपुर विमानस्थलमा सञ्चारकर्मीहरूसँग कुरा गर्दै उनले विश्वविद्यालयमा यस्ता क्रियाकलापहरूको नियन्त्रण आवश्यक रहेको औंल्याइन्।
त्रिभुवन विश्वविद्यालयमा देखिएको गुण्डागर्दी नियन्त्रणका लागि गृहमन्त्रीसँग सुरक्षा व्यवस्था मागेको भन्दै उनले विश्वविद्यालयमा राजनीति होइन, गुण्डागर्दी भइरहेको बताइन्।“हरेक क्षेत्रमा गृह मन्त्रालयले सुरक्षा दिने भएका कारण गृहमन्त्रीसँग सुरक्षा मागिएको हो।” उनले भनिन्
उनले विश्वविद्यालयमा गुण्डागर्दी र अपराधिक गतिविधि सह्य नहुने बताउँदै, यस्ता क्रियाकलापहरूको विरुद्ध सुरक्षा मागिएको उल्लेख गरिन्। यस्ता गतिविधिहरूलाई राजनीतिक संरक्षण हुनु नहुने उनको धारणा थियो। मन्त्री भट्टराई नवलपुरमा आयोजना हुने कार्यक्रममा सहभागी हुन भरतपुर आइपुगेकी हुन्।
