काठमाडौं – त्रिभुवन अन्तर्राष्ट्रिय विमानस्थल (टिआईए) यात्रुको चाप धान्न नसक्ने अवस्थामा पुगेको छ । टिआईएको विकल्पमा निर्माण भएका दुई वटा विमानस्थलमा नियमित उडान सञ्चालनमा आउन नसक्दा यहाँ यात्रुको चाप धान्न नसक्ने अवस्थामा पुगेको हो ।
वार्षिक ८० लाख यात्रु ओहोरदोहोर गर्न सक्ने क्षमताको त्रिभुवन अन्तर्राष्ट्रिय विमानस्थलमा बर्सेनि यात्रुको संख्या बढ्दै गएपछि यसको असर उडान सुरक्षा, सुरक्षित तथा सहज यात्रा र उडान सुनिश्चिततामा पर्न थालेको नेपाल नागरिक उड्डयन प्राधिकरणले जनाएको छ । ‘अहिले विमानस्थलले वार्षिक क्षमताभन्दा १० लाख बढी यात्रुको चाप धान्दै छ,’ प्राधिकरणका सूचना अधिकारी ज्ञानेन्द्र भुलले भने, ‘बर्सेनि १० देखि १५ प्रतिशतसम्म हवाई यात्रुको चाप बढ्दै गएकाले यसले विमानस्थल सञ्चालन, उडान सुनिश्चितता र सुरक्षामा समेत भार थप्दै लगेको छ ।’
उनका अनुसार सन् २०२४ को छ महिनामा मात्रै त्रिभुवन अन्तर्राष्ट्रिय विमानस्थलबाट ४६ लाख ६२ हजार ४२५ यात्रुले हवाई सेवा लिएका छन् । अहिलेकै अनुपातमा यात्रुको संख्या बढ्दै गए यस वर्ष करिब ९५ लाख यात्रुले हवाई सेवा लिने देखिएको छ । ‘चाडबाड र दोस्रो पर्यटकीय सिजन आउन लागेकाले हवाई यात्रुको संख्या बढ्दै जाने देखिन्छ,’ उनले भने, ‘यात्रुको हिसाबले यो वर्ष नयाँ रेकर्ड कायम हुन सक्छ ।’
उडान चहलपहलले एकातिर विमानस्थल साँघुरो हुँदै गएको छ भने अर्कोतर्फ वार्षिक १० लाखभन्दा बढीले हवाई यात्रुको संख्या बढ्दै जाँदा जहाजले आकाश र जमिनमा उडान अवतरणको पालो कुर्नुपर्ने उडान सुरक्षा तथा विमानस्थलको सुरक्षामा समेत भार थप्दै लगेको छ ।
प्राधिकरणको तथ्यांक अनुसार सन् २०२३ मा त्रिभुवन अन्तर्राष्ट्रिय विमानस्थलबाट अन्तर्राष्ट्रिय र आन्तरिक उडानबाट ८६ लाख ९१ हजारभन्दा बढी यात्रुले हवाई सेवा लिएका थिए, जुन हालसम्मकै सबैभन्दा उच्च ससंख्या हो ।
सन् २०२२ मा भएका एक लाख ३२ हजार ५१४ उडान अवतरणबाट ७९ लाख ५४ हजार ४९६ यात्रुले ओहोरदोहोर गरेका थिए । सन् २०२१ मा भएका ९२ हजार ९३२ उडान अवतरणबाट ५० लाख ३३ हजार ८७१ यात्रुले हवाई यात्रा गरेका थिए । कोरोना महामारीअघि सन् २०१९ मा भएका एक लाख २४ हजार २५८ उडान अवतरणबाट ७३ लाख २७ हजार ३१ जनाले हवाई सेवा लिएका थिए ।
प्राधिकरणका अनुसार यस वर्षको ६ महिनामा अन्तर्राष्ट्रियतर्फ २४ लाख ९० हजार ६१२ जनाले हवाई यात्रा गरेका छन् । हाल त्रिभुवन अन्तर्राष्ट्रिय विमानस्थलबाट अन्तर्राष्ट्रियतर्फ ३० वायुसेवा कम्पनी र आन्तरिकतर्फ १२ वटा हेलिकोप्टर कम्पनीसहित ९ वायुसेवा कम्पनीका जहाजले हवाई सेवा दिँदै आएका छन् ।
तपाईको प्रतिक्रिया
सम्बन्धित समाचार
