समाचार सुन्नुहोस :
काठमाडौँ – नक्कली भुटानी शरणार्थी प्रकरणमा आरोपित बेचन झाले पोलिग्राफ जाँच (झूट जाँच) गराउन नमानेको खुलेको छ । काठमाडौं जिल्ला प्रहरी परिसरका अनुसन्धान अधिकृतहरुले झाको बयानको सत्यता जाँच गर्न पोलिग्राफ परीक्षण गराउने प्रयास गरे पनि झाले त्यसलाई अस्वीकार गरेका हुन्। झाविरुद्ध काठमाडौं जिल्ला अदालतमा दायर गरिएको मुद्दामा झाले पोलिग्राफ परीक्षण गर्न अस्वीकार गरेको विवरणसमेत समावेश गरिएको छ।
सरकारी वकिलको उपस्थितिमा झाले प्रहरीसँग दिएको बयानमा आफूलाई नक्कली भुटानी शरणार्थी प्रकरणबारे केही थाहा नभएको दाबी गरेका थिए। अनुसन्धानका क्रममा प्रहरीले अर्का आरोपी रामशरण केसीले झाको नाममा काटेको दुई करोड रुपैयाँको चेकसमेत बरामद गरेको थियो, तर झाले त्यसबारे आफू अनभिज्ञ रहेको बताएका छन्।
अनुसन्धान अधिकृतहरुले झालाई झा र केसीबीचको एक संवादको अडियो सुनाउँदा पनि झाले त्यो आवाज आफ्नो नभएको दाबी गरेका छन्। केसीका अनुसार, मन्त्रिपरिषद्मार्फत केही निर्णय गराउन केसीले उक्त रकम मागेका थिए। चेक दिने क्रममा भएको कुराकानीको अडियो केसीले प्रहरीलाई उपलब्ध गराएका थिए। अडियोमा केसीले मन्त्रिपरिषद्बाट निर्णय भएका/नभएको बारेमा सोधेका छन्, र झाले त्यसलाई अस्वीकार गर्दै अडियो आफ्नो नभएको बताएका छन्।
