काठमाडौं – तीजमा अहिले गाइने कतिपय गीतहरूमा न तीजको मर्म बोक्ने शब्द छन्, न प्रस्तुति छ र सङ्गीत नै । विवाह गरेर गएकी महिलाले आफ्ना भोगाइ अभिव्यक्त गर्न तीज गीत गाउने परम्परा छ ।
यी परम्परालाई निरन्तरता दिँदै मौलिक तीज गीत ‘बरिलै…’ सार्वजनिक भएको छ । मौलिक लाइभ नेपालको प्रस्तुति मा तयार भएको गीत मौलिक लाइभ नेपाल युट्युबबाट सार्वजनिक भएको हो । सागर विरहीको शब्द/संगीत रहेको गीतमा जुना श्रीष मगर, कालिका रोका, ज्ञानु ठाडा मगर, फुलमाया मगर र माया मगरले संयुक्त रूपमा स्वर दिएकी हुन् ।
वर्षाको बेला नदी, खोला र बाटो बिग्रेकाले माइती आउन नपाएको यथार्थ बोलेको छ । माइतीको सम्झनालाई मनमा संघाल्दै बालापनका साथीसंगीलाई पनि गीतमार्फत याद गरिएको छ । ‘आफू पराईघरमा हुँदा माइती कस्तो भयो होला ? सम्झने मात्रै देख्न नपाइने’ जस्ता भोगाइलाई गीतमार्फत प्रस्तुत गरिएको छ । प्राय सृजनाहरू काल्पनिक हुन्छन् तर यो गीतले कल्पनामै डुबेर हजारौँ चेलीको यथार्थ पीडा दर्साएको छ ।
गीतको भिडिओको निर्देशन पनि सागर विरही नै गरेका छन् भने रोशन गाहा मगरको सम्पादन छ । छायांकन सुरेश श्रेष्ठ र गोपाल सुनार गरेका हुन् । मौलिकता बचाउँदै तयार पारिएको गीतले सामाजिक पारिवारिक आयाम जोडेकोले दर्शक श्रोताले मन पराउने अपेक्षा गरिएको छ ।
