काठमाडौं – अमेरिकाको टेक्सासमा एक कारले मानिसहरुको समूहलाई ठक्कर दिँदा ८ जनाको मृत्यु भएको छ । घरबारविहीन तथा आप्रवासीहरुको आश्रयस्थल नजिक रहेको बस स्टपमा मानिसहरुको एक समूहलाई कारले ठक्कर दिएको टेक्सास प्रहरीले जनाएको छ ।
उक्त घटनामा ६ जना घाइते भएका छन् । केहीको अवस्था गम्भीर छ । मेक्सिकोको सीमा नजिकैको ब्राउन्सभिल सहरमा बिहान साढे ८ बजेको समयमा उक्त घटना भएको बीबीसीले जनाएको छ । बस कुरिरहेका करिब २० जनाको समूहलाई कारले ठक्कर दिएको थियो । घटनाका पीडितहरु भेनेजुएलाका नागरिक रहेको बताइएको छ ।
उक्त कारका चालकलाई प्रहरीले नियन्त्रणमा लिएको छ । ब्राउन्सभिल प्रहरीले घटना नियोजित हो वा होइन भन्नेबारे स्पष्ट नभएको जनाएको छ ।
