काठमाडौं – नेपाली राष्ट्रिय क्रिकेट टिमको प्रमुख प्रशिक्षक भारतका मोन्टी देशाई नियुक्त भएका छन् । करिब एक महिना लामो प्रक्रियापछि युवा तथा खेलकुद मन्त्रालयले मोन्टीलाई नियुक्त गर्न बाटो खोलेको हो ।
राष्ट्रिय खेलकुद परिषद (राखेप) संघ संस्था समन्वय शाखा प्रमुख चन्द्र राईले युवा तथा खेलकुद मन्त्रालयले पारित गरी आएको पत्र क्यानलाई पठाइसकिएको जानकारी दिए । ‘प्रारम्भिक सहमति आएको छ । अब सम्झौता गरी औपचारिक रुपमा प्रशिक्षण थाल्नुहुन्छ । थप केही प्रक्रियाहरु चल्दै गर्नेछन्,’ राईले भने ।
औपचारिक नियुक्ति हुन बाँकी रहे पनि अघिल्लो साताको आइतबारदेखि नै मोन्टीले नेपाल क्रिकेट टिमलाई आनौपचारिक प्रशिक्षण गराइरहेका छन् । नेपालले आईसीसी क्रिकेट विश्वकप लिग टू अन्तर्गत त्रिवि मैदान कीर्तिपुरमा नामिविया र स्कटल्याण्डसँग त्रिकोणात्मक श्रृंखला खेल्दैछ ।
लिग टू मा रहेका ७ टिमबीच अन्तिमबाट दोस्रो स्थानमा रहेको नेपालले आसन्न एक दिवशीय विश्वकप छनोटमा स्थान बनाउन तथा एक दिवशीय मान्यता कायम राख्न श्रृंखलामा अधिकांश खेल जित्नुपर्ने स्थिति छ ।
