काठमाडौं – बलिवुड अभिनेता सुशान्त सिंह राजपुत मृत्यु प्रकरणमा नार्कोटिक्स कन्ट्रोल ब्यूरो (एनसीबी) ले बुधबार आरोपपत्र दायर गरेको छ । एनसीबीले सुशान्तलाई अभिनेत्री रिया चक्रवर्तीले लागूऔषध दिएको आफ्नो आरोप पत्रमा उल्लेख गरेको छ ।
आरोपपत्रमा रियाका भाइ शोभिकसहित ३५ जनालाई आरोपी बनाइएको छ । यो मुद्दाको सुनुवाई जुलाई २७ मा विशेष अदालतमा हुने भएको छ । रिया दोषी प्रमाणित भएमा १० वर्षको जेल सजाय हुन सक्छ ।
१४ जुन २०२० मा सुशान्त सिंह राजपूतको शव उनको मुम्बईको घरमा भेटिएको थियो । सुशान्तको परिवारले रिया र उनको परिवारमाथि गम्भीर आरोप लगाएका थिए । रिया र सुशान्त रिलेशनशिपमा थिए र लिभ-इनमा बस्थे । सुशान्तको मृत्यु हुनुभन्दा एक साताअघि रियाले घर छोडेकी थिइन् । आरोप लगत्तै रिया, उनका भाइ लगायत धेरै मानिसहरु शंकाको घेरामा परेका छन् । यस प्रकरणमा लागुऔषधको एंगल आएपछि एनसीबीले अनुसन्धान थालेको थियो ।
एनसीबीले सबै अभियुक्तहरूले मार्च २०२० र डिसेम्बर २०२० बीच उच्च समाज र बलिउडमा लागूपदार्थको प्रयोग र बिक्री गर्ने गरेको बताएको छ । नार्कोटिक्स कन्ट्रोल ब्युरोले आफ्नो आरोपपत्रमा सुशान्त सिंह लागूऔषध मुद्दामा अभियुक्त नम्बर १० रिया चक्रवर्तीले आरोपी नम्बर ६ स्यामुएल मिरान्डा, आरोपी नम्बर ७ शौभिक चक्रवर्ती र आरोपी नम्बर ८ दीपेश सावन्त र अन्यबाट गाँजाको धेरै डिलिवरी गरेको जनाएको छ ।
