काठमाडौँ – बेलायतमा ‘नेपाली फिल्म फेस्टिभल इन लन्डन २०२२’ हुने भएको छ। थर्ड आईको आयोजनामा बेलायतको राजधानी लन्डनमा ५ दिने ‘नेपाली फिल्म फेस्टिभल इन लन्डन २०२२’ आयोजना हुने भएको हो।
उक्त महोत्सवको नेपाल व्यवस्थापनको जिम्मा लिएको संगीक्षा फिल्मस् इन्टरटेनमेन्ट प्राइभेट लिमिटेडका अध्यक्ष मनोज केसीले ५ दिनसम्म १० वटा फिल्म प्रदर्शन गरिने बताएका छन्।
फेस्टिभलले नेपाली फिल्मको बजार विस्तारमा टेवा पुर्याउनुका साथै नेपाली कला, संस्कृतिलाई समेत प्रवर्द्धन गर्ने केसीले बताए। उनका अनुसार महोत्सवको अन्तिम दिन फिल्मकर्मीहरूलाई सम्मान समेत गरिनेछ।
थर्ड आईका प्रमुख विकास देवकोटाको सक्रियतामा आयोजना हुन लागेको महोत्सवमा नेपालबाट करिब ४० जना फिल्मकर्मीको सहभागी हुनेछन्।
थर्ड आईका नेपाल च्याप्टर प्रतिनिधि हरि सिलवालले सेप्टेम्बरमा सुरू हुने फेस्टिभललाई सभ्य र भव्य बनाउने गरी तयारी भइरहेको जानकारी गराए। आयोजकले महोत्सवमा प्रदर्शन गरिने फिल्महरूको छनोट प्रक्रिया सुरू भएको समेत जानकारी दिए
युट्युबमा नआएका, विभिन्न टेलिभिजन च्यानलबाट प्रसारण नभएका तर हलमा मात्र रिलिज भएका फिल्महरू मध्येबाट १० वटा फिल्मलाई महोत्सवमा सहभागी गराइनेछ। महोत्सव घोषणा कार्यक्रममा वरिष्ठ कलाकार निर शाह, नायिका करिश्मा मानन्धर, निरुता सिंह, नायक सरोज खनाल लगायतले शुभकामना दिएका थिए। कलाकार नीर शाहले यस्तो खालका कार्यक्रमले विश्व बजारमा नेपाली फिल्म पुग्ने बताए।
