टोकियो – बागलुङ समाज जापानले आयोजना गरेको पहिलो रनिङ कप भलिबल प्रतियोगिताको उपाधि गल्कोट स्पोर्ट्स क्लब जापानले हात पारेको छ । साईतामा केनको टोडा स्पोर्ट्स सेण्टरमा १४ टीमबीच भएको खेलमा गल्कोट उपाधि जितेको हो ।
आयोजक बागलुङ समाज जापान उपविजेता हुँदा घुम्टे युवा परिवार तेस्रो भएको थियो । प्रतियोगितामा १६ टीमले नाम दर्ता गराएपनि प्रतिस्पर्धा भने १४ टीमबीच मात्रै भएको हो ।
प्रथम रनिङ कपको विजेताले २ लाख ६५ हजार ५ सय ५५ येनसहित प्रमाणपत्र, मेडल र रनिङ कप पाएको छ भने उपविजेताले १ लाख ६५ हजार ५ सय ५५ येनसहित प्रमाणपत्र, मेडल प्राप्त गरेको छ । यस्तै तेस्रो हुने टीमले ८५ हजार ५ सय ५५ येन,सहित प्रमाणपत्र र मेडल पाएको आयोजकले जनाएको छ ।
प्रतियोगितामा उत्कृष्ट खेलाडीमा गल्कोट स्पोर्ट्स क्लबका रेशम बस्नेत, उत्कृष्ट स्पाइकरमा बागलुङ समाजका अभिजीत रायमाझी भए भने उत्कृष्ट डिफेन्डरमा सिजुओका स्पोर्ट्स क्लबका सुनील बस्नेत घोषित भएका थिए । यसैगरी उत्कृष्ट लिफ्टरमा घुम्टे युवा परिवारका सुशान्त मल्ल बने ।
सबै विद्याका उत्कृष्टलाई पुरस्कारसहित सम्मान गरिएको कार्यक्रम संयोजक विरोध चालिसेले जानकारी दिए । आयोजक संस्थाका अध्यक्ष प्रेम कँडेलले खेल सम्पन्न गर्नमा महत्त्वपूर्ण भूमिका निर्वाह गर्ने सबैप्रति आभार व्यक्त गरे ।
