पेट्रोलियम पदार्थमा एक सातामै दुई पटक मूल्यवृद्धि

काठमाडौं – नेपाल आयल नियगले एक सातामा नै दुई पटक पेट्रोलियम पदार्थको मूल्यवृद्धि गरेको छ । मंगलबार निगमले डिजेल, पेट्रोल तथा मट्टितेलमा २ रुपैयाँ मूल्यवृद्धि गरेको हो ।

माघ २८ गते पनि निगमले डिजेल, पेट्रोल र मट्टितेलमा २ रुपैयाँ मूल्यवृद्धि गरेको थियो । सोही दिन ग्यासमा प्रतिसिलिन्डर २५ रुपैयाँ मूल्य वृद्धि भएको थियो ।

पछिल्लो वृद्धिसँगै काठमाडौँ उपत्यकामा अब पेट्रोलको मूल्य ११४ रुपैयाँ, र डिजेल/मट्टितेलको मूल्य ९७ रूपैयाँ कायम गरिएको छ । मंगलबार राति १२ बजेदेखि वृद्धि भएको मूल्य लागू हुने निगमले जनाएको छ ।

हवाइ इन्धनमा पनि २ रुपैयाँ प्रतिलिटर मूल्यवृद्धि गरिएको छ । हवाइ इन्धनको मूल्य अब ६७ रुपैयाँ प्रतिलिटर पुगेको छ ।