कोरोनाले ४.८ प्रतिशत खुम्चियो जापानको अर्थतन्त्र

टोकियो – जापानको अर्थतन्त्र सन् २०२० मा चार दशमलव ८ प्रतिशतले खुम्चिएको छ । सन् २०२० को अन्तिम त्रैमासमा जापानको अर्थतन्त्रमा उल्लेख्य सुधार देखिएको भए पनि यसले समग्र वर्षको आर्थिक संकुचनलाई भने रोक्न सकेन ।

जापानको अर्थतन्त्र सन् २००९ पछि पहिलोपटक संकुचनमा परेको हो । अन्तिम त्रैमासमा जापानको कूल गार्हस्थ्य उत्पादन अघिल्लो त्रैमासको तुलनामा तीन प्रतिशत बढेको थियो । गत वर्षको तेस्रो त्रैमासको लागि जापानको आर्थिक वृद्धिदर पाँच दशमलव ३ प्रतिशत थियो ।

तर, दोस्रो त्रैमासमा भने जापानको अर्थतन्त्रमा उल्लेख्य गिरावट देखिएको थियो । विश्लेषकहरुले जापान अहिले कोरोनाको खोप वितरणमा पश्चिमा मुलुकभन्दा पछि परेकाले आगामी दिनमा यसको नकारात्मक असर अर्थतन्त्रमा देखिन सक्ने आशंका व्यक्त गरेका छन् । –एजेन्सी