स्यामुएल इटो चढेको कार दुर्घटना

काठमाडौं – बार्सिलोनाका पूर्व स्टार स्ट्राइकर स्यामुएल इटो चढेको कार दुर्घटना भएको छ । बिपरित दिशाबाट आइरहेको बससँग ठोक्किँदा उनी चढेको कार दुर्घटनामा परेको हो ।

अन्तर्राष्ट्रिय सञ्चार माध्यमका अनुसार उनी सवार कार क्यामरुनको डुआला र बाफोसम क्षेत्रको सडकमा दुर्घटनामा परेको हो ।

दुर्घटनामा परेका इटोलाई सामान्य चोट लागेको छ । कारमा सवार सबैजना सकुसल भए पनि उनको कारको अगाडिको भाग भने क्षतविक्षत भएको छ ।

गत वर्ष खेल जीवनबाट सन्यास लिएका ३९ वर्षीय इटोले सन् २०१४ पछि अन्तर्राष्ट्रिय फुटबलबाट सन्यास लिएका हुन् ।

चार पटकको वर्ष अफ्रिकन खेलाडी घोषित इटोले ४ च्याम्पियन्स लिग, ३ ला लिगा र १ सिरी ए उपाधि हात पारेका छन् ।

उनले बार्सिलोनासँगै, चेल्सी, इन्टर मिलानमा खेलेका थिए ।