काठमाडौं – चिनियाँ अर्बपति ज्याक माँको एन्ट ग्रुपले संसारकै अहिलेसम्मकै ठूलो प्राथमिक शेयर निष्कासन (आईपीओ) गर्ने भएको छ । वित्तीय प्रविधिको कम्पनी एन्ट ग्रुप (अलिबाबा) ले हङकङ र सांघाईमा ३४ अर्ब डलरको आईपीओ जारी गर्न लागेको साउथ चाइना मर्निङ पोष्टले लेखेको छ ।
ईकमर्शको विश्वप्रसिद्ध कम्पनी एन्ट ग्रुपले डिजिटल पेमेन्ट सेवा अलिपे सञ्चालन गर्छ । प्राथमिक शेयर निष्कासनपश्चात कम्पनीको बजार मूल्य ३१० अर्ब डलर हुने अनुमान गरिएको छ, जुन जेपी मोर्गान चेज तथा अरु विश्व प्रसिद्ध ब्यांकको हाराहारी हो ।
एन्ट ग्रुपले प्राथमिक शेयर निष्कासनमार्फत बजारमा उठाउन लागेको रकम साउदी अरेबियाको सरकारी तेल कम्पनी साउदी अराम्कोले गत वर्ष आईपीओमार्फत संकलन गरेको भन्दा धेरै रकम हो । साउदी अराम्कोले २९.४ अर्बको आईपीओ जारी गरेको थियो । अलीबाबाले सन् २०१४ मा न्यूयोर्क स्टक एक्सचेन्जमा २५ अर्ब डलरको शेयर निष्कासन गरेको थियो ।
डिजिटल ब्यांकिङ सेवा प्रदान गर्ने अलिपेका करोडौं ग्राहक छन् । अलिपे आफैंले क्रेडिट कार्ड, डेबिट कार्ड, म्युचुअल फण्ड आदि सञ्चालन गर्छ। अलिपेमा मासिक ७३ करोड ग्राहकले कारोबार गर्छन् ।
यो विश्वप्रसिद्ध अर्को कम्पनी पेपालका सक्रिय ग्राहकको संख्या भन्दा दोब्बर धेरै हो । प्राथमिक शेयर निष्कासनपछि ५६ वर्षीय चिनियाँ अर्बपति ज्याक माँको सम्पत्ति ७१ अर्ब अमेरिकी डलर नाघ्ने अनुमान गरिएको छ। यसले उनलाई संसारकै सर्वाधिक ११ औं धनी बनाउनेछ ।-एजेन्सी
