काठमाडौं – संघीय राजधानी काठमाडौंमा कोरोना संक्रमित बढ्दै गएका छन्।
आइतवार एकै दिन ३० जना संक्रमित भेटिएको पुष्टि स्वास्थ्य तथा जनसंख्या मन्त्रालयले गरेको छ।
आइतवार सार्वजनिक गरिएको विवरण अनुसार काठमाडौं जिल्लामा मात्रै अहिलेसम्मकै धेरै २७ जना कोरोना संक्रमित भेटिएका छन्। त्यसैगरी ललितपुरमा २ जना र भक्तपुरमा एकजना संक्रमित भेटिएका छन्।
स्वास्थ्य तथा जनसंख्या मन्त्रालयले उपलब्ध गराएको तथ्यांक अनुसार १५ पुरुष र १५ महिलामा संक्रमण देखिएको छ ।
जसमध्ये विभिन्न अस्पतालमा २१ जनामा संक्रमण देखिएको छ भने ४ जना नेपाली सेना र ४ जना सशस्त्र प्रहरी अस्पतालका रहेको मन्त्रालयले जनाएको छ । त्यस्तै, १ जना बुढानिलकण्ठका स्थानीय रहेको मन्त्रालयले जनाएको छ ।
कुन अस्पतालमा कति ?
आइतबार कोरोना पुष्टि भएकामध्ये युनिफाइड हस्पिटल बलम्बुमा १ जना पुरुष, श्री वीरेन्द्र अस्पताल छाउनीमा १ जना पुरुष रहेका छन् । त्यसैगरी, ह्याम्स अस्पतालमा ३ जना पुरुष र १ जना महिलामा कोरोना देखिएको छ ।
मन्त्रालयको तथ्यांक अनुसार इशान बाल अस्पताल १ जना महिला, नेपाल मेडिकल कलेज अत्तरखेल २ जना महिला, न्यूरो अस्पताल बाँसबारीमा २ जना पुरुष, त्रिवि शिक्षण अस्पतालबाट ५ जना महिला र १ जना पुरुष रहेका छन् ।
नेपाल पुलिस हस्पिटलमा २ जना महिला, दीघार्यु गुरु अस्पतालमा चाबहिलमा १ जना महिला, चिरायु अस्पतालका १ जना महिलामा पनि कोरोना पुष्टि भएको छ ।
नारायणहिटी ब्यारेक गोरखबहादुर गणका ४ जना पुरुषमा कोरोना पोजेटिभ देखिएको छ । यस्तै, काठमाडौं एपीएफका ४ जना पुरुषमा र यस्तै, एक बुढानिलकण्ठका एक पुरुषमा संक्रमण देखिएको हो ।
अस्पतालहरुमा संक्रमण र जोखिम बढेसँगै चिकित्सकहरुले अत्यवश्यकीय अवस्थामा बाहेक अस्पताल नजान समेत सुझाव दिइरहेका छन् ।
