काठमाडौं – नेपाल वायुसेवा निगमले बुधबारदेखि मलेसिया उडान स्थगित गर्ने भएको छ । मलेसिया सरकारले बुधबारदेखि विदेशी नागरिकलाई प्रवेशमा रोक लगाउने निर्णय गरेसँगै निगमले उडान स्थगन गर्ने भएको हो ।
कोरोना भाइरस संक्रमणको जोखिमलाई मध्यनजर गर्दै मलेसिया सरकारले मार्च १८ देखि ३१ मार्चसम्म विदेशी नागरिकलाई प्रवेशमा प्रतिबन्ध गर्ने निर्णय गरेको छ । विदेशीलाई प्रवेशमा प्रतिबन्द लगाएसँगै मलेसिया सरकारले आफ्ना नागरिकलाई समेत अन्य देशमा नजान आग्रह गरेको छ। कोरोना भाइरसका कारण मलेसियाले शैक्षिक संस्था तथा सरकारी निकायहरूसमेत बन्द गर्ने तयारी गरेको छ ।
निगमका अपरेसन विभागका प्रमुख दिपु जुहर्चनका अनुसार काठमाडौं-मलेसिया दैनिक एक उडान हुँदै आएको थियो । यस अघि निगमले कतारको दोहामा उडान स्थगन गरेको थियो । त्यस्तै, दुई उडान हुँदै आएको भारतको नयाँ दिल्लीमा आईतबारदेखि एक उडान मात्रै गरिरहेको छ ।
