जापानमा रहेका नेपालीहरूलाई राजदूतावासले भन्यो- ’सुरक्षित रहनू’

टोकियो – चीनको वुहानबाट फैलिएको कोरोना भाइरसको महामारीबाट बच्न जापानस्थित नेपाली राजदूतावासले जापानबासी नेपालीहरुलाई उच्च सतर्कता अपनाउन अपिल गरेको छ ।
जापानमा पनि कोरोना भाइरसको संक्रमण बढ्दो क्रममा रहेको सन्दर्भमा उच्च सतर्कता अपनाउन दूतावासले एक विज्ञप्तिमार्फत अपिल गरेको हो ।

विज्ञप्तिमा भनिएको छ – केही समय देखि विश्वका विभिन्न देशहरुमा कोरोना भाइरसको प्रकोप देखिएको र सो प्रकोप जापानमा समेत देखापरेको व्यहोरा विदितै छ । उक्त महामारी अझै नियन्त्रण हुन सकेको छैन र केही देशहरुमा बढ्दो क्रममा रहेको तथ्य विभिन्न सञ्चार माध्यमबाट जानकारी हुन आएको छ । यस सन्दर्भमा सोबाट बच्न हामी आफैले पनि सावधानी अपनाउनु पर्ने देखिएकोले निम्न बमोजिम गर्नु र गराउनुहुन नेपाली राजदूतावास पुनः हार्दिक अनुरोध गर्दछ ।
१. संक्रमित बिरामीको सम्पर्कमा नआउने
२. भाइरस प्रभावित क्षेत्र र देशको यात्रा नगर्ने र ती क्षेत्र र देशको यात्रा गरेका व्यक्तिहरुसंग सम्पर्क गर्दा सावधानी अपनाउने
३. यथाशक्य सार्वजनिक यातायातको प्रयोग नगर्ने
४. भेटघाट, भेला, जमघट, बैठक जस्ता कार्यक्रमहरु सकभर नगर्ने
५. घरबाहिर निस्कँदा मास्कको प्रयोग गर्ने र साबुनपानीले हात धुने, स्यानीटाइजरको प्रयोग गर्ने
६. जापान सरकारले जारी गर्ने निर्देशन तथा सूचनाहरुको जानकारी लिइरहने र सोही बमोजिम सावधानी र सतर्कताका अपनाउने
७. यदि रुघाखोकी आदि जस्ता लक्षणहरु देखिएमा यथाशक्य विद्यालय तथा अफिस नजाने
८. चार दिनसम्म लगातार ३७ दशमलव ५ डिग्री सेल्सियस भन्दा माथि शरीरको तापक्रम रहेमा तोकिएको मेडिकल सेन्टरमा सम्पर्क गर्ने
यसको संक्रमणबाट बच्न यथाशक्य आफै सावधानी अपनाउँदा आफू बच्न र अरुलाई पनि बचाउन सकिने हुँदा सावधानीका उपायहरु अपनाउन र अरुलाई पनि अपनाउनका लागि प्रेरित गर्नुहुन पुनः अनुरोध गरिन्छ । शंका लागेमा जापान सरकारले उपलब्ध गराएको हटलाइन टेलिफोन नम्बर -050-3816-2787_ वा निम्नलिखित मेडिकल फेसिलिटीमा यथाशक्य चाँडो सम्पर्क राख्नुहुन समेत अनुरोध छ ।
Medical institutions offering assistance in foreign languages
<https://www.jnto.go.jp/emergency/jpn/mi_guide.html>
FAQ about the Novel Virus
<https://www.mhlw.go.jp/stf/seisakunitsuite/bunya/kenkou_iryou/dengue_fever_qa_00014.html>
<https://www.metro.tokyo.lg.jp/english/topics/2020/0214_00covid19.html>

विस्तृत जानकारीका लागि हेर्नुहोस् दूतावासले जारी गरेको सूचना :-