ओमानसँग नेपाल १८ रनले पराजित

काठमाडौं – नेपाल ओमानसँग १८ रनले पराजित भएको छ । त्रिदेशीय एकदिवसीय अन्तर्राष्ट्रिय क्रिकेट श‌ृङ्‌खलाअन्तर्गतको पहिलो खेलमा नेपाल ओमानसँग पराजित भएको हो ।

ओमानले दिएको १ सय ९८ रनको लक्ष्य पछ्याएको नेपालले ४६.५ बलमा सबै विकेट गुमाउन पुग्यो । नेपालका लागि शरद भेषावकरले सर्वाधिक ५५ रन बनाए । त्यस्तै उपकप्तान दीपेन्द्र सिंह ऐरीले ३६, सन्दीप लामिछानेले २८ र विनोद भण्डारीले २६ रन बनाए ।

नेपालका लागि ओपनर पारस खड्का ३ र कप्तान ज्ञानेन्द्र मल्ल १ रनमा आउट भएका थिए । त्यस्तै आरिफ शेख ६, सुशन भारी र अविनाश बोहोराले ८-८ रन बनाए । रोहित र करण भने शून्यमै आउट भएका थिए । ओमानका लागि जिशन मक्सुदले सर्वाधिक ३ विकेट लिए । विलाला खान र कलिमुल्लाहले दुई-दुई विकेट लिए ।