काठमाडौं- एउटा ढुकुर दिनहुं एउटै समयमा आउँछ, दिनभरि बिरामी रुङ्छ र फर्किन्छ । मान्छे र पशुपक्षीबीचको मित्रता त सुनिँदै/देखिँदै आएको हो तर ढुकुर नै यसरी बिरामी कुरुवा बनेको खबर भने पत्याउन मुस्किलै पर्छ । तर, मोरङ जिल्लाको सुन्दरपुर गाविस–४ मा पत्याउनैपर्ने घटना भएको छ । बिरामी कुरुवा ढुकुर हेर्न हिजोआज बिरामीको घरमा घुइँचो नै लाग्ने गरेको छ ।
५० वर्षीया धनमाया गुरुङ बिरामी परेपछि उनलाई एउटा ढुकुरले साथ दिइरहेको छ । धनमायालाई कुर्न हरेक दिन बिहानै ढुकुर आउने गर्छ । यो क्रम करिब २२ दिनदेखि जारी छ । स्थानीय बासिन्दाका अनुसार पेटसम्बन्धी रोगबाट पीडित धनमायालाई कुर्न ढुकुर बिहान ६ बजे आउँछ । दिनभर बिरामीको साथमै बसेर ढुकुर साँझ ६:४५ बजेतिर फर्कन्छ ।
‘यतिसम्म कि ढुकुर समाउन खोज्दा अरूसँग मान्दैन भने बिरामीसँग सहजै मान्छ,’ स्थानीय किशोरी अस्मिता राईले टेलिफोन सम्पर्कमा भनिन्, ‘अरूले दिएको खानेकुरा पनि खाँदैन, बिरामीले दिएको मात्र खान्छ ।’ कमजोर आर्थिक अवस्थाका धनमायाका पति, तीन छोरा र एक छोरी छन् । उनका सबै छोराछोरीको बिहेबारी भइसकेको छ । दुई छोरा वैदेशिक रोजगारमा र माइला छोरा सुनसरीको इटहरीस्थित एक सुनचाँदी पसलमा काम गर्छन् । माइला छोराबुहारी र पति धु्रवसँग बस्दै आएकी धनमायालाई दुई महिनादेखि पेटसम्बन्धी रोगले सताएको हो ।
स्थानीय विष्णुमाया राईका अनुसार विराटनगरस्थित एक अस्पतालले अचेत अवस्थाका बिरामीलाई उपचार सम्भव नहुने भन्दै फर्काएपछि पाँच दिनअघि मात्र पेटमा जमेको पानी इटहरीका एक चिकित्सकले घरमै आएर फालिदिएका थिए । पानी फालेपछि विगतमा भन्दा स्वस्थ महसुस गरेकी धनमाया सहज रूपमा बोल्न सक्ने भएकी छन् । कान्छा छोराले पठाइदिएको खर्च पनि सकिएपछि हाल पत्नीको उपचारका लागि धु्रवले चन्दा सहयोग जुटाउन थालेको राईले बताइन् ।
