काठमाडौं – ‘म तिम्रो सहर छोडि टाढा’, ‘पुरानो डुंगा’ जस्ता चर्चित गीतका गीतकार बी.बी थापाले एकैपटक २७ वटा म्युजिक एल्बम सार्वजनिक गरेका छन। होटल अन्नपूर्णमा पूर्वउपराष्ट्रपति परमानन्द झाको उपस्थितिमा हालै २७ वटा एल्बमको एक सय ४५ वटा गीत एकैसाथ सार्वजनिक गरिएको हो।
गिनिज बुक अफ वर्ल्ड रेकर्डमा नयाँ क्याटगोरीमा एकैसाथ एकै व्यक्तिको २७ एल्बम सार्वजनिक गरेर नयाँ कीर्तिमान कायम राख्ने गीतकार थापाको प्रयास रहेको छ। २७ वटा एल्बममा विभिन्न चर्चित र नयाँ कलाकारहरुले आफ्नो स्वर दिएका छन। गीतकार बी.बी थापाको एकल शब्द, मनोज चौलागाईको एकल संगीतमा रहेको एल्बम ‘मायाको डुंगा’ मा भने नव गायक कौशलराज खड्काको एकल स्वर रहेको छ।
‘कति हात’, ‘सम्बन्ध’, ‘राजधानी’, ‘लभर ब्वाई’, ‘चन्द्रागिरी हिल’ बोलका ५ वटा गीत यस एल्बममा समावेश छन । एल्बमको एउटा गीत ‘कति हात’ को यसअघि नै भिडियो निर्माण गरी सार्वजनिक गरिसकिएको छ। बीबी थापा इन्टरटेन्मेन्टको निर्माणमा एल्बम तयार पारिएको हो।***
