काठमाडौं– शान्ति तथा पुनः निर्माणमन्त्री टोपबहादुर रायमाझीले पाँच बुँदे सहमति कांग्रेस र एमाले लगायतका दलहरुले कार्यान्वयन गरे प्रधानमन्त्रीले पद छाड्ने स्पष्ट पार्दै कसैले सडकबाट माग्दैमा अहिले प्रधानमन्त्रीको राजिनामा कुनै पनि हालतमा नआउने बताए ।रिपोर्टर्स क्लब नेपालले मंगलवार आयोजना गरेको साक्षात्कारमा उनले भने–अब सहमतिको सरकार पनि प्रधानमन्त्री डा बाबुराम भट्टराईकै नेतृत्वमा बन्नुपर्छ । त्यसको विकल्प छैन । १०२ दल भएको मुलुकमा सत प्रतिसत सहमतिको सरकार बन्नै सक्दैन । कांग्रेस र एमालेले दिमाग सम्हालेर सहमतिमा जानुपर्छ ।
उनले बर्तमान सरकार कार्यकारी अधिकार सम्पन्न भएको दावी गर्दै राष्ट्रपतिले प्रधानमन्त्रीलाई हटाउन नसक्ने ठोकुवा गरे । उनले भने–राष्ट्रपति संविधान अनुसार नै चल्नुपर्छ । राष्ट्रपतिले प्रधानमन्त्री हटाउन असम्भव छ ।
उनले संसद नभएको अवस्थामा अध्यादेशबाट बजेट नल्याए कहाँबाट ल्याउने भनि प्रश्न गर्दै सरकारले अध्यादेशबाट ल्याउने बजेट राष्ट्रपतिले रोक्नै नमिल्ने दावी गरे । उनले भने– अहिले बजेट ल्याउन हुँदैन भन्नु आफ्नै खुट्टामा बन्चरो हान्नु हो ।
कांग्रेस र एमालेले मुलुकमा लादेर धमिलो पानीमा माछा मार्ने षडयन्त्र गरेको आरोप लगाउँदै मन्त्री रायमाझीले लोकतान्त्रिक पद्धतिअनुसार चल्ने भए ताजा जनादेशमा जानै पर्ने बाध्यता सुनाए ।
उनले अब यूद्धको र पुरानै सत्ताको धङधङी बोकेर मुलुक चल्न नसक्ने भन्दै मुलुकमा खतरनाक ध्रुविकरणको आशंका ब्यक्त गरे । ***
