प्रधानमन्त्री पुष्पकमल दाहाल बसेकै सिट शनिबार जलाइयो

काठमाडौं – प्रधानमन्त्री पुष्पकमल दाहाल मंसिर १२ गते साझा यातायातको पुल्चोक कार्यालयमा पुग्नुभयो । उहाँले ३० वटा साझाले ल्याएका बस अवलोकन गर्नुभयो ।

त्यसपछि उहाँ साझा बस चढेर सिंहदरबारस्थित कार्यालय जाने निर्णयमा पुग्नुभयो । तत्काल साझा यातायातका अध्यक्ष कनकमणि दिक्षितले प्रधानमन्त्रीलाई बा ४ ख ५६४८ नम्बरको बसमा चढाउनुभयो ।

उक्त सिट विशेष सुविधायुक्त थियो । दीक्षितको मनसाय साझाले सर्बसाधारणलाई दिन चाहेको सेवासुविधा विषयमा सरकारलाई अवगत गराउनु थियो ।

प्रधानमन्त्री दाहाल चढेको उक्त बसको सीट शनिबार बन्दको अवज्ञा गरेको भन्दै जलाइएको छ ।

नेत्रविक्रम चन्द नेतृत्वको नेपाल कम्युनिष्ट पार्टीका कार्यकर्ताले शनिबार बालाजु बाइपासमा आगो लगाएको बस प्रधानमन्त्री दाहालले उदघाटनका क्रममा चढ्नुभएको थियो ।