काँग्रेस सभापति देउवा विधानविपरीत, सात महिनासम्म पनि पदाधिकारी मनोनयन भएन

काठमाडौँ – सभापति निर्वाचन भएको दुई महिनाभित्र पार्टीका सबै निकायलाई पूर्णता दिनुपर्ने व्यवस्था काँग्रेस विधानमा छ । तर पनि सभापति शेरबहादुर देउवाले निर्वाचित भएको सात महिनासम्म पनि पार्टीका विभिन्न निकायलाई पूर्णता दिन सक्नुभएको छैन ।

आन्तरिक समीकरण मिलाउन समस्या परेपछि उपसभापति, महामन्त्री मनोनयन गर्नसमेत देउवालाई सकस परेको आजको नयाँ पत्रिकामा समाचार छ । तीनपटक गरेर ११ केन्द्रीय सदस्य मनोनित गरे पनि अझै १० केन्द्रीय सदस्य मनोनित गर्न बाँकी छ ।

दुई महनाभित्रै गठन गर्नुपर्ने १० विभाग, केन्द्रीय कार्यसम्पादन समितिजस्ता पार्टीका प्रमुख संयन्त्रलाई पनि पूर्णता दिन देउवाले सकेका छैनन् । पार्टी प्रवक्ता चयन गर्न पनि उहाँले ढिलाई गर्नुभएको छ । ***